ചെന്നൈ: തമിഴ്നാട്ടില് ജോസഫ് വിജയിന്റെ ജോലി തെറിപ്പിച്ചത് മുൻ ബിഗ് ബോസ് താരവും ആർട്ടിസ്റ്റുമായ ജൂലി. ജോസഫ് വിജയിയുടെ തെരഞ്ഞെടുപ്പ് വിജയം പ്രവചിച്ച ജ്യോതിഷിയും പാർട്ടി വക്താവുമായ റിക്കി രാധൻ പണ്ഡിറ്റ് വെട്രിവേലിനെ മുഖ്യമന്ത്രിയുടെ ഓഫീസർ ഓൺ സ്പെഷ്യൽ ഡ്യൂട്ടി ആയി നിയമിച്ചതോടെയാണ് ജൂലി അതിനെതിരെ ആഞ്ഞടിച്ചത്.
മുഖ്യമന്ത്രി ആയ ശേഷം നടത്തിയ ആദ്യ തട്ടിപ്പിന് അഭിനന്ദനങ്ങൾ എന്നായിരുന്നു ജൂലിയുടെ പോസ്റ്റ്. ജോസഫ് വിജയ്ക്ക് എതിരെ അത്രയ്ക്ക് ശക്തമായ ഭാഷയിലാണ് ജൂലി സംസാരിച്ചത്. “ഞങ്ങൾ പെരിയോരെ ഇഷ്ടപ്പെടുന്നവരാണ്. എന്തായാലും പ്രധാനപ്പെട്ടൊരു ജോലി, അത്രയും പ്രധാനപ്പെട്ടൊരു ജ്യോത്സ്യന് കൊടുത്തിരിക്കുന്നു(പരിഹാസത്തോടെ). അയാൾക്ക് കൊടുക്കുന്ന പ്രതിഫലം എവിടെ നിന്നാണ് വരുന്നത് ? അത് ഞങ്ങളുടെ നികുതി പണമല്ലേ?”- ഇതായിരുന്നു ജൂലിയുടെ പോസ്റ്റ്.
ഒപ്പം ജനങ്ങളുടെ നികുതിപ്പണം ഒരിക്കലും ദുർവിനിയോഗം ചെയ്യില്ലെന്ന് പ്രചരണ റാലിക്കിലെ വിജയ് പറയുന്നൊരു വീഡിയോയും ജൂലി പങ്കുവച്ചിട്ടുണ്ട്. പിന്നാലെ നിരവധി പേരാണ് കമന്റുമായി രംഗത്ത് എത്തിയത്. പലരും ജൂലിയെ സപ്പോർട്ട് ചെയ്തെങ്കിലും ഭൂരിഭാഗം പേരും ജൂലിയ്ക്ക് എതിരെ കടുത്ത വിമർശനമാണ് ഉന്നയിക്കുന്നത്. എന്തായാലും ഇതോടെ ജോസഫ് വിജയ് തന്റെ ജ്യോത്സ്യന്റെ നിയമനം റദ്ദാക്കിയതായി പ്രഖ്യാപിക്കുകയായിരുന്നു.
ജോസഫ് വിജയ് വിജയിച്ചപ്പോൾ, പ്രതിപക്ഷത്ത് ഡിഎംകെ ആണെന്നും അവർ ആ സ്ഥാനത്ത് ഇരിക്കുന്നത് എത്ര അപകടകരമാണെന്ന് വരും ദിവസങ്ങളിൽ വിജയ്ക്ക് മനസിലാകുമെന്നും ജൂലി നല്കിയ താക്കീതും വൈറലായിരുന്നു. .
