കൊല്ലം: ജന്മഭൂമി സ്വന്തം കുടുംബമാണെന്നും തന്റെ രാഷ്‌ട്രീയ ജീവിതത്തില്‍ വലിയ പിന്തുണ നല്‍കിയിട്ടുള്ള മാധ്യമമാണ് ജന്മഭൂമിയെന്നും ചാത്തന്നൂരിലെ എംഎല്‍എ ബി.ബി. ഗോപകുമാര്‍. ജന്മഭൂമി കൊല്ലം യൂണിറ്റിന്റെ നേതൃത്വത്തില്‍ എംഎല്‍എയ്‌ക്ക് നല്‍കിയ സ്വീകരണ പരിപാടിയില്‍ സംസാരിക്കുകയായിരുന്നു അദ്ദേഹം.
നാമനിര്‍ദേശ പത്രിക നല്‍കുന്നതിന് മുന്‍പ് ഞാന്‍ ഇവിടേക്കാണ് വന്നത്. തെരഞ്ഞെടുപ്പ് വിജയത്തിന് ശേഷവും ആദ്യം എത്തുന്ന മാധ്യമസ്ഥാപനം ജന്മഭൂമിയാണ്. സ്വന്തം കുടുംബം എങ്ങനെയാണോ തനിക്ക് പിന്തുണ തന്നിരുന്നത് ജന്മഭൂമിയില്‍ നിന്നും അങ്ങനെ തന്നെയാണുണ്ടായത്. ചാത്തന്നൂരിലെ വിജയം ചിട്ടയായ സംഘടനാപ്രവര്‍ത്തനത്തിന്റെ കൂടി വിജയമാണെന്നും അദ്ദേഹം പറഞ്ഞു. ജന്മഭൂമി എംഡി എം. രാധാകൃഷ്ണന്‍ എംഎല്‍എയെ പൊന്നാട അണിയിച്ച് ആദരിച്ചു. ജന്മഭൂമിയുടെ ഉപഹാരവും എംഎല്‍എയ്‌ക്ക് അദ്ദേഹം കൈമാറി.
ബിജെപി വെസ്റ്റ് ജില്ലാ പ്രസിഡന്റ് എസ്. പ്രശാന്ത്, കൗണ്‍സിലര്‍ ശശികല റാവു, യൂണിറ്റ് അസിസ്റ്റന്റ് മാനേജര്‍ എസ്. രമേശ്, ന്യൂസ് എഡിറ്റര്‍ എം. സതീശന്‍, പ്രിന്റര്‍ ആന്റ് പബ്ലിഷന്‍ വി. മുരളീധരന്‍, മാര്‍ക്കറ്റിംഗ് മാനേജര്‍ എ.ജി. ശ്രീകുമാര്‍, ജന്മഭൂമി യൂണിറ്റ് അംഗങ്ങള്‍ തുടങ്ങിയവര്‍ പങ്കെടുത്തു. ചടങ്ങില്‍ ശ്രീകേഷ് പൈ ‘ദ ലീഡര്‍ ഇന്‍ യു’ എന്ന പുസ്തകം എംഎല്‍എയ്‌ക്ക് സമ്മാനിച്ചു.
