ഗുരുവായൂര്: അരിയന്നൂരില് ഡോക്ടര് ദമ്പതികളുടെ വീട്ടില്നിന്ന് 10 പവന് സ്വര്ണാഭരണങ്ങള് മോഷണം പോയി. അരിയന്നൂര് സെന്ററിനടുത്ത് മെയിന് റോഡില് പോക്കാക്കില്ലത്ത് കുഞ്ഞിമുഹമ്മദിന്റെ വീട്ടിലാണ് മോഷണം നടന്നത്. മുകള്നിലയിലെ ഹാളിലെ അലമാരയില് സൂക്ഷിച്ചിരുന്ന ആഭരണങ്ങളാണ് മോഷ്ടിക്കപ്പെട്ടത്.
കുഞ്ഞിമുഹമ്മദിന്റെ മകളും തൃശൂര് ഇഎസ്ഐ ആശുപത്രിയിലെ ഡോക്ടറുമായ ബുഷറയും ഇവരുടെ ഭര്ത്താവ് ഡോ.അബൂബക്കര് മുഹമ്മദ് റാഫിയും മക്കളുമാണ് വീട്ടിലെ താമസക്കാര്.മുകളിലെ മുറിയില് ഡോക്ടര് ദമ്പതികള് ഉറങ്ങുമ്പോഴായിരുന്നു മോഷണം. വെള്ളിയാഴ്ച പുലര്ച്ചെ ഒരു മണിയോടെ ആണ് മോഷണം നടന്നതെന്ന് സിസിടിവി ദൃശ്യങ്ങളില്നിന്ന് വ്യക്തമായി.
മുകള്നിലയിലെ പുറത്തേക്കുള്ള വാതില്വഴിയാണ് മോഷ്ടാവ് അകത്ത് കടന്നത്. ഹാളിലെ അലമാരയില് സൂക്ഷിച്ചിരുന്ന രണ്ടു മാലകള്, വളകള്, കമ്മലുകള് എന്നിവയാണ് നഷ്ടപ്പെട്ടത്. ശനിയാഴ്ച രാവിലെ പുറത്തുപോകുന്നതിനായി ഡോ.ബുഷറ മാല അണിയാനായി നോക്കിയപ്പോഴാണ് ആഭരണങ്ങള് നഷ്ടപ്പെട്ടത് അറിഞ്ഞത്.തുടര്ന്ന് ഹാളിനുള്ളിലെ സിസിടിവി പരിശോധിച്ചപ്പോള് മോഷണം നടന്നത് വ്യക്തമായി.
ഗുരുവായൂര് പൊലീസ് അന്വേഷണം തുടങ്ങി.
