തിരുവനന്തപുരം: പത്തു വര്ഷത്തെ കാത്തിരിപ്പിനു ശേഷം ഭരണം കിട്ടിയപ്പോള് മുഖ്യമന്ത്രിപദത്തെച്ചൊല്ലിയുള്ള കലഹം യുഡിഎഫിന് വലിയ തലവേദന.
ഗ്രൂപ്പ് സമവാക്യവും സമുദായ സമവാക്യവും പാലിച്ച് മന്ത്രിമാരെ നിശ്ചയിക്കുന്നതിലും ഘടകകക്ഷികളുടെ സമ്മര്ദത്തെ അതിജീവിക്കുന്നതിലും പെട്ട് വരുംനാളുകളില് തമ്മിലടി കനക്കുമെന്ന് തന്നെയാണ് സൂചന. മുസ്ലിംലീഗിന്റെയും മതതീവ്രവാദികളുടെയും സമ്മര്ദത്തിനു മുന്നില് കോണ്ഗ്രസിന് കീഴടങ്ങേണ്ടിയും വരും. ഒപ്പം മുഖ്യമന്ത്രിസ്ഥാനവും മന്ത്രിസ്ഥാനവും ലഭിക്കാത്തവരുടെ നിരാശയും വിഴുപ്പലക്കലും സഹിക്കേണ്ടതുമുണ്ട്.
കെ. സുധാകരന് ഉള്പ്പെടെയുള്ളവരെ മൂലയ്ക്കിരുത്തി സ്വയംപ്രഖ്യാപിത മുഖ്യമന്ത്രി സ്ഥാനാര്ത്ഥിയായി വി.ഡി. സതീശന് രംഗത്തുവന്നതോടെയാണ് തര്ക്കങ്ങള് ഉടലെടുത്തത്. ഫലംവന്നാല് 24 മണിക്കൂറിനകം മുഖ്യമന്ത്രിയെ തീരുമാനിക്കുമെന്നൊക്കെ പറഞ്ഞിരുന്നെങ്കിലും സ്ഥാനമോഹികളായി രംഗത്തുള്ള മൂന്നുപേര് തമ്മിലുള്ള തര്ക്കം തീര്ക്കാന് ഹൈക്കമാന്ഡിന് വിയര്ക്കേണ്ടി വരുമെന്ന് തന്നെയാണ് സൂചന. തെരഞ്ഞെടുപ്പ് ഫലം വരുന്നതിനു മുമ്പുതന്നെ മുഖ്യമന്ത്രി പദത്തിനുവേണ്ടിയുള്ള കടിപിടി തുടങ്ങിയിരുന്നു.
വി.ഡി. സതീശന് വേണ്ടി കണ്ണൂരിലും ആലുവയിലും ഫ്ളക്സ് ബോര്ഡുകള് ഉയര്ന്നു. യുഡിഎഫ് ജയിക്കും, സതീശന് നയിക്കും എന്ന വിധത്തില് പോസ്റ്ററുകള് ഉയര്ന്നതോടെ രമേശ് ചെന്നിത്തല പക്ഷവും അതിവേഗം കരുക്കള് നീക്കി.
പിആര് വര്ക്കിന്റെ ബലത്തില് രമേശ് ചെന്നിത്തലയെപ്പോലുള്ള മുതിര്ന്ന നേതാക്കളെ തഴയാന് അനുവദിക്കില്ലെന്ന് ‘കോണ്ഗ്രസ് ഫാമിലി’ എന്ന പേരില് പ്രത്യക്ഷപ്പെട്ട ഈ ബോര്ഡുകള് വരാനിരിക്കുന്ന തമ്മിലടിയുടെ സൂചനയാണ്. ഇതിനിടെ എഐസിസി ജനറല് സെക്രട്ടറിയായ കെ.സി. വേണുഗോപാലിന് പിന്തുണ ഉറപ്പാക്കാന് അജയ് തറയിലും രംഗത്തുണ്ട്. തെരഞ്ഞെടുപ്പ് പ്രഖ്യാപിക്കും മുമ്പുതന്നെ മുഖ്യമന്ത്രി പദത്തില് കണ്ണെറിഞ്ഞ് ശശിതരൂര് എംപിയും കളത്തിലുണ്ട്. പരമാവധി എംഎല്എമാരെ ഒപ്പം കൂട്ടാനും ഘടകകക്ഷികളുടെ പിന്തുണ ഉറപ്പാക്കാനും കടുത്ത മത്സരവും തുടങ്ങിയിട്ടുണ്ട്.
ദേശീയപത്രങ്ങളിലുള്പ്പെടെ പെയ്ഡ് വാര്ത്തകളും പരസ്യവും നല്കി ഓരോ ഗ്രൂപ്പും സജീവമാണ്. പോര്വിളിയും ഉപജാപകവൃത്തിയുമായി സൈബര് സംഘങ്ങളും രംഗത്തുണ്ട്. വരുംദിവസങ്ങളില് സോഷ്യല്മീഡിയ വഴിയുള്ള പോര്വിളികളും പരസ്യപ്രസ്താവനകളും പരിധിവിടുമെന്നാണ് വിലയിരുത്തല്. തന്റെ പേരില് വ്യാജ സ്ക്രീന്ഷോട്ടുകള് പ്രചരിപ്പിക്കുന്നുവെന്നാരോപിച്ച് കെപിസിസി ഡിജിറ്റല് മീഡിയ സെല് കോഓര്ഡിനേറ്റര് വിമല ബിനു തന്നെ പരാതി നല്കിയിട്ടുമുണ്ട്.
