ചെന്നൈ: തമിഴ്നാട് മുഖ്യമന്ത്രി എം.കെ. സ്റ്റാലിനെ അദ്ദേഹത്തിന്റെ ഉരുക്കുകോട്ടയായ കൊളത്തൂര് മണ്ഡലത്തില് അട്ടിമറിച്ചത് മുമ്പ് അദ്ദേഹത്തിന്റെ വിശ്വസ്തനായിരുന്ന വി.എസ്. ബാബു. വിജയുടെ തമിഴക വെട്രി കഴകം സ്ഥാനാര്ത്ഥിയായാണ് ബാബു മത്സരിച്ച് തന്റെ പഴയ നേതാവിനെ മലര്ത്തി അടിച്ചത്.8,795 വോട്ടുകള്ക്കാണ് ബാബു ജയിച്ചത്.
വി.എസ്. ബാബുവിന്റെ വിജയം 15 വര്ഷം നീണ്ട ഒരു രാഷ്ട്രീയ പകവീട്ടലിന്റെ കഥ കൂടിയാണ്.
2011ല് കൊളത്തൂര് മണ്ഡലം രൂപീകരിച്ചപ്പോള് സ്റ്റാലിന്റെ തെരഞ്ഞെടുപ്പ് ചുമതലയുളള വിശ്വസ്തനായിരുന്നു വി.എസ്. ബാബു. അന്ന് സ്റ്റാലിന് ജയിച്ചെങ്കിലും ഭൂരിപക്ഷം 2,734 വോട്ടുകളായി കുറഞ്ഞു. ഇതോടെ ഡിഎംകെ നേതൃത്വം ബാബുവിനെ ഉത്തരവാദിത്തങ്ങളില് നിന്ന് നീക്കി, പി.കെ. ശേഖര് ബാബുവിനെ പകരക്കാരനായി നിയമിച്ചു.
അന്ന് പാര്ട്ടിയില് നിന്ന് പുറന്തള്ളപ്പെട്ട ബാബു 2016-ല് എഐഎഡിഎംകെയില് എത്തി. എന്നാല് പത്ത് വര്ഷത്തിന് ശേഷം 2026 ഫെബ്രുവരിയില് ടിവികെയില് ചേര്ന്ന ബാബുവിന് ലഭിച്ചത് സ്റ്റാലിനെതിരെ മത്സരിക്കാനുള്ള നിയോഗമായിരുന്നു. 2016-ല് 37,000-വും 2021-ല് 70,000-വും ഭൂരിപക്ഷം നേടി അജയ്യനായി നിന്ന സ്റ്റാലിനെ അതേ മണ്ണില് തന്നെ ബാബു മലര്ത്തിയടിക്കുകയായിരുന്നു.
