ടെഹ്റാന്‍: ഇന്ത്യയുടെ നയതന്ത്രവിജയം വിളിച്ചോതി ഹോര്‍മുസ് കടലിടുക്ക് കടന്ന് മറ്റൊരു ഇന്ത്യന്‍ എല്‍പിജി ടാങ്കര്‍. ഇറാനുമായുള്ള ഉന്നതതല ധാരണയുടെ അടിസ്ഥാനത്തിലാണ് എംടി സര്‍വ്വശക്തി എന്ന ഈ എല്‍പിജി ഗ്യാസ് നിറച്ച ടാങ്കറിന് ഹോര്‍മുസ് കടലിടുക്ക് കടക്കാന്‍ അനുമതി ലഭിച്ചത്.
അമേരിക്ക ഏത് സമയവും ഇറാനെ ഹോര്‍മുസില്‍ ആക്രമിച്ചേക്കാം എന്ന സ്ഥിതി മാറിയിട്ടില്ല. ആക്രമിച്ചാല്‍ തിരിച്ചടിക്കും എന്ന ഉഗ്രശാസനവുമായാണ് ഇറാന്‍ നിലകൊള്ളുന്നത്. ഇത്രയും സങ്കീര്‍ണ്ണമായ സാഹചര്യത്തില്‍ ഒരു എല്‍പിജി ടാങ്കറിന് ഹോര്‍മുസ് കടന്നുവരാന്‍ കഴിയുക എന്നത് ഇന്ത്യയുടെ നയതന്ത്രവിജയത്തിന്റെ അടയാളമായി കണക്കാക്കപ്പെടുന്നു.
ഈ എല്‍പിജി ടാങ്കര്‍ മെയ് രണ്ടിനാണ് ഹോര്‍മുസ് കടലിടുക്ക് കടന്നത്. മെയ് 13ന് വിശാഖപട്ടണത്ത് എത്തിച്ചേരും. ഇന്ത്യന്‍ നാവികസേനയുടെ കപ്പലുകള്‍ ഈ എല്‍പിജി ടാങ്കറിന് സുരക്ഷ നല്‍കി ഒപ്പം യാത്ര ചെയ്യുന്നു.
46,313 മെട്രിക് ടണ്‍ ഗ്യാസാണ് ഇതില്‍ ഉള്ളത്. കടുത്ത എല്‍പിജി ക്ഷാമം അഭിമുഖീകരിക്കാന്‍ പോകുന്ന ഇന്ത്യയ്‌ക്ക് വലിയ ആശ്വാസമാണിത്. മാര്‍ഷല്‍ ഐലന്‍റിന്റെ കൊടിവെച്ച കപ്പലാണിത്.
