ബംഗളൂരു:കനത്ത മഴയിലും കാറ്റിലും ശിവാജിനഗറിലെ പ്രശസ്തമായ ബൗറിംഗ് ആന്‍ഡ് ലേഡി കര്‍സണ്‍ ആശുപത്രിയുടെ ചുറ്റുമതില്‍ തകര്‍ന്ന് ഏഴ് പേര്‍ മരണം. മരിച്ചവരില്‍ എറണാകുളും സ്വദേശികളായ ലത, സ്മിത എന്നിവരും ഉള്‍പ്പെടുന്നുവെന്നാണ് പ്രാഥമിക വിവരം.
ചൊവ്വാഴ്ച വൈകുന്നേരമാണ് നഗരത്തില്‍ അതിശക്തമായ മഴയും കാറ്റും ഉണ്ടായത്. മഴയില്‍ നിന്ന് രക്ഷപ്പെടാനായി വഴിയോര കച്ചവടക്കാരും കാല്‍നടയാത്രക്കാരും ആശുപത്രി മതിലിനോട് ചേര്‍ന്ന് കെട്ടിയ ടാര്‍പോളിന്‍ ഷീറ്റുകള്‍ക്ക് താഴെ അഭയം തേടി. ഈ സമയത്താണ് കാറ്റിലും മഴയിലും പഴയ മതില്‍ പെട്ടെന്ന് ഇടിഞ്ഞുവീണത്. അവശിഷ്ടങ്ങള്‍ക്കിടയില്‍ കുടുങ്ങിയവരെ പുറത്തെടുക്കാന്‍ നാട്ടുകാരും അഗ്നിരക്ഷാ സേനയും ഉടന്‍ തന്നെ രക്ഷാപ്രവര്‍ത്തനം ആരംഭിച്ചു. അരമണിക്കൂറോളം നീണ്ടുനിന്ന അതിശക്തമായ മഴയും ആലിപ്പഴ വര്‍ഷവുമാണ് നഗരത്തില്‍ നാശനഷ്ടങ്ങള്‍ വരുത്തിയത്.
നഗരത്തിന്റെ പല ഭാഗങ്ങളിലും മരങ്ങള്‍ കടപുഴകി വീഴുകയും ഗതാഗതം തടസപ്പെടുകയും ചെയ്തു. മുഖ്യമന്ത്രി സിദ്ധരാമയ്യ സ്ഥലം സന്ദര്‍ശിച്ച് സ്ഥിതിഗതികള്‍ വിലയിരുത്തി. അപകടത്തില്‍ മരിച്ചവരുടെ കുടുംബങ്ങള്‍ക്ക് സര്‍ക്കാര്‍ ധനസഹായം പ്രഖ്യാപിച്ചു.
