ഓപ്പറേഷൻ സിന്ദൂർ സമയത്ത് ബരാക് 8 ഉപയോഗിച്ച് ഇന്ത്യ തകർത്ത മിസൈലാണ് ഫത്തേ-II . കഴിഞ്ഞ ദിവസമാണ് പാകിസ്ഥാൻ സൈന്യം വീണ്ടും ഫത്തേ-II മിസൈലിന്റെ പരിശീലന വിക്ഷേപണം നടത്തിയത് . ആർമി റോക്കറ്റ് ഫോഴ്സ് കമാൻഡാണ് ഈ പരീക്ഷണത്തിനു പിന്നിൽ . പാകിസ്ഥാന്റെ സ്വന്തം കമ്പനിയായ ഗ്ലോബൽ ഇൻഡസ്ട്രിയൽ ആൻഡ് ഡിഫൻസ് സൊല്യൂഷൻസ് (GIDS) ആണ് ഈ മിസൈൽ നിർമ്മിച്ചത്. പാകിസ്ഥാന്റെ സർക്കാർ ഉടമസ്ഥതയിലുള്ള പ്രതിരോധ കമ്പനിയാണ് GIDS.
ഒരേസമയം ഒന്നിലധികം റോക്കറ്റുകൾ വിക്ഷേപിക്കാനും മികച്ച ലക്ഷ്യ കൃത്യത കൈവരിക്കാനും കഴിയുന്ന മിസൈലാണ് ഫത്തേ എന്നാണ് പാകിസ്ഥാന്റെ അവകാശവാദം. റഷ്യയുടെ ടൊർണാഡോ-എസ്, ചൈനയുടെ PHL-191 സംവിധാനങ്ങളുമായി താരതമ്യപ്പെടുത്താവുന്നതാണിതെന്നും പാകിസ്ഥാൻ അവകാശപ്പെടുന്നുണ്ട് .
പരിശീലന ആവശ്യങ്ങൾക്കാണ് ഫത്തേ വിക്ഷേപണം നടത്തിയതെന്നാണ് പാകിസ്ഥാൻ സൈന്യം പറയുന്നത്. സൈനികരെ പരിശീലിപ്പിക്കുക, മിസൈലിന്റെ വിവിധ സാങ്കേതിക ഘടകങ്ങൾ പരിശോധിക്കുക, സിസ്റ്റത്തിന്റെ മൊത്തത്തിലുള്ള പ്രകടനം വിലയിരുത്തുക എന്നിവയായിരുന്നു ഇതിന്റെ ലക്ഷ്യങ്ങളെന്നും പറയപ്പെടുന്നു.
ഫത്തേ-II-ന് പരമാവധി 400 കിലോമീറ്റർ വരെ ദൂരപരിധിയുണ്ട്. പാകിസ്ഥാൻ അതിർത്തിക്കടുത്തുള്ള നിരവധി ഇന്ത്യൻ നഗരങ്ങൾ അതിന്റെ ആക്രമണ പരിധിയിൽ വരാം. ജമ്മു, പത്താൻകോട്ട്, ജലന്ധർ, ലുധിയാന, പഞ്ചാബിലുടനീളമുള്ള മറ്റ് വിവിധ പ്രദേശങ്ങൾ എന്നിവ , സിർസ പോലുള്ള ഹരിയാനയുടെ ചില ഭാഗങ്ങളും ഈ പരിധിയിൽ വരും എന്നാണ് പാക് മാധ്യമങ്ങളുടെ റിപ്പോർട്ടുകൾ . എന്നാൽ ഇന്ത്യയുടെ ബ്രഹ്മാസ്ത്രങ്ങൾക്ക് മുന്നിൽ പിടിച്ചു നിൽക്കാനുള്ള ശക്തിയൊന്നും ഫത്തേക്കില്ലെന്നതാണ് സത്യം.
ഫത്തേ-II ന് തുല്യമോ അതിലധികമോ ദൂരപരിധിയുള്ള നിരവധി മിസൈൽ സംവിധാനങ്ങൾ ഇന്ത്യയിലുണ്ട്. പിനാക്ക റോക്കറ്റ് സിസ്റ്റത്തിന്റെ നിലവിലെ പതിപ്പിന് 75–120 കിലോമീറ്റർ ദൂരപരിധിയുണ്ട്. ഫത്തേ-II നെ നേരിടാൻ, തക്ക വിധത്തിൽ 400 കിലോമീറ്റർ വരെ വിപുലീകൃത ദൂരപരിധിയുള്ള പിനാക്ക Mk5, Mk6 വകഭേദങ്ങൾ ഇന്ത്യ ഇപ്പോൾ വികസിപ്പിച്ചുകൊണ്ടിരിക്കുകയാണ്.
പൃഥ്വി-II മിസൈലിന് 350 കിലോമീറ്റർ ദൂരപരിധിയുണ്ട്. പ്രളയ് മിസൈലിനാകട്ടെ 150 മുതൽ 500 കിലോമീറ്റർ വരെ ദൂരപരിധിയുണ്ട്. വളരെ വേഗത്തിൽ ലക്ഷ്യങ്ങളെ ആക്രമിക്കാൻ കഴിവുള്ള ഒരു ക്വാസി-ബാലിസ്റ്റിക് മിസൈലാണിത്. ബ്രഹ്മോസ് സൂപ്പർസോണിക് ക്രൂയിസ് മിസൈലിന് 300 മുതൽ 500 കിലോമീറ്റർ ദൂരപരിധിയുണ്ട്.
കരയിൽ നിന്നോ കടലിൽ നിന്നോ വായുവിൽ നിന്നോ ഇത് വിക്ഷേപിക്കാൻ കഴിയും. കൂടാതെ, അഗ്നി-1 മിസൈലിന് 700 കിലോമീറ്ററിൽ കൂടുതൽ ദൂരപരിധിയുണ്ട്. അതുകൊണ്ട് തന്നെ ഫത്തേ കാണിച്ച് ഇന്ത്യൻ സൈന്യത്തെ വെല്ലുവിളിക്കാൻ പാകിസ്ഥാൻ ശ്രമിച്ചാൽ പാക് സൈന്യത്തിന്റെ അവസ്ഥ കൂടുതൽ പരിതാപകരമായേക്കും.
ഫത്തേ-II-വിനെ ആർക്കും തടയാനാകില്ലെന്നാണ് പാക് സൈന്യത്തിന്റെ മറ്റൊരു വീരവാദം. എന്നാൽ ഇന്ത്യയുടെ എസ്-400, ബരാക്-8 (എംആർ-സാം), ആകാശ്, മറ്റ് ബാലിസ്റ്റിക് മിസൈൽ പ്രതിരോധ (ബിഎംഡി) സംവിധാനങ്ങൾക്ക് മുന്നിൽ ഫത്തേയ്ക്ക് അതിജീവിക്കാൻ ആവില്ല.
‘ഓപ്പറേഷൻ സിന്ദൂർ’ സമയത്ത്, ബരാക്-8 സിസ്റ്റം ഉപയോഗിച്ച് ഫത്തേ-II-ന് സമാനമായ മിസൈലുകൾ ഇന്ത്യ വിജയകരമായി തടഞ്ഞു. ഡൽഹിയെ ഉദ്ദേശിച്ച ലക്ഷ്യമാക്കി തൊടുത്ത മിസൈൽ ഹരിയാനയിലെ സിർസയ്ക്ക് മുകളിൽ വച്ചാണ് തകർത്തത് .
