ലഡാക്ക്: കേന്ദ്രഭരണ പ്രദേശമായ ലഡാക്കില്‍ അഞ്ച് പുതിയ ജില്ലകള്‍ രൂപീകരിച്ചു. ഇതിനുള്ള കേന്ദ്രവിജ്ഞാപനത്തിന് ലഡാക്കിലെ ലഫ്. ഗവര്‍ണര്‍ വി.കെ. സക്സേന അംഗീകാരം നല്‍കി. ലഡാക്കിന് ചരിത്രദിനമാണെന്നും അദ്ദേഹം പറഞ്ഞു. സാന്‍സ്‌കര്‍, ദ്രാസ്, ഷാം, ന്യൂബ്ര, ചാങ്താങ് എന്നീ ജില്ലകളാണ് രൂപീകരിച്ചത്.
2024 ആഗസ്തില്‍ ആഭ്യന്തര മന്ത്രി അമിത് ഷായുടെ നേതൃത്വത്തില്‍ ആഭ്യന്തര മന്ത്രാലയം അംഗീകരിച്ചതാണ് തീരുമാനം. ഇത് ഭരണം ശക്തിപ്പെടുത്തും, ലഡാക്കിലെ ജനങ്ങള്‍ക്ക് പൊതുസേവനങ്ങള്‍ വേഗത്തില്‍ ലഭ്യമാക്കും. സക്സേന പറഞ്ഞു.
പ്രധാനമന്ത്രി നരേന്ദ്ര മോദിയുടെ വികസിതവും സമ്പന്നവുമായ ലഡാക്ക് എന്ന കാഴ്ചപ്പാടിന് അനുസൃതമായാണ് ഇതെന്നും വി.കെ. സക്സേന എക്സിൽ കുറിച്ചു.
പുതിയ ജില്ലകൾ രൂപീകരിക്കുന്നത്, ഭരണകൂടം പൗരന്മാരുമായി കൂടുതൽ അടുക്കാൻ കാരണമാകുന്നതിനു പുറമെ, വളർച്ചയ്‌ക്കും തൊഴിൽ ലഭ്യതയ്‌ക്കും സംരംഭകത്വത്തിനും പുതിയ വഴികൾ തുറന്നിടും. ഈ ചരിത്രപരമായ തീരുമാനത്തിലൂടെ ലഡാക്കിലെ ഓരോ പൗരനും പ്രയോജനം നേടുമെന്ന് ഞാൻ ഒരിക്കൽക്കൂടി ഉറപ്പുനൽകുന്നു. കൂടുതൽ ശോഭനവും ശക്തവും സമ്പന്നവുമായ ഒരു ഭാവിയിലേക്ക് നമ്മൾ ഒരുമിച്ച് നീങ്ങുകയാണ്, അദ്ദേഹം കുറിച്ചു.
2019-ലാണ് ജമ്മു-കശ്മീരിന് പ്രത്യേകപദവി നൽകിയിരുന്ന ഭരണഘടനയുടെ 370-ാം അനുച്ഛേദം കേന്ദ്രസർക്കാർ പിൻവലിച്ചത്. ജമ്മു കശ്മീർ, ലഡാക്ക് എന്നീ പ്രദേശങ്ങൾ കേന്ദ്രഭരണ പ്രദേശങ്ങളാക്കി വിഭജിച്ചു. നിയമസഭയുള്ള കേന്ദ്രഭരണ പ്രദേശമാണ് ജമ്മു കശ്മീർ.
2019ലാണ് ജമ്മു- കശ്മീരിന് പ്രത്യേകപദവി നല്‍കുന്ന ഭരണഘടനയുടെ 370-ാം അനുച്ഛേദം കേന്ദ്രസര്‍ക്കാര്‍ പിന്‍വലിച്ചത്. ജമ്മുകശ്മീര്‍, ലഡാക്ക് എന്നീ പ്രദേശങ്ങള്‍ കേന്ദ്രഭരണപ്രദേശങ്ങളാക്കി വിഭജിച്ചു. നിയമസഭയുള്ള കേന്ദ്രഭരണപ്രദേശമാണ് ജമ്മു കശ്മീര്‍.
