കൊല്ക്കത്ത: ബംഗാളില് ബിജെപിയുടെ പ്രചരണങ്ങള്ക്കിടെ ഭരണകക്ഷിയായ തൃണമൂല് കോണ്ഗ്രസ് മനപ്പൂര്വം പ്രശ്നങ്ങള് സൃഷ്ടിക്കുന്നതായി ആരോപണം. കഴിഞ്ഞ ദിവസം ഹൂഗ്ലിയില് ബിജെപി സ്ഥാനാര്ത്ഥി ബിമന് ഘോഷിന്റെ തെരഞ്ഞെടുപ്പ് പ്രചരണത്തിനിടെ ടിഎംസി അനുയായികള് സംഘടിച്ചെത്തി പ്രകോപിപ്പിക്കുകയും ഇത് സംഘര്ഷത്തിലേക്കും നീങ്ങി. നാല് ബിജെപി പ്രവര്ത്തകര്ക്ക് പരിക്കേറ്റു.
ബിജെപിയുടെ തെരഞ്ഞെടുപ്പ് പ്രകടനപത്രികയില് സംസ്ഥാനത്തെ ജനങ്ങള്ക്ക് നല്കിയ വാഗ്ദാനങ്ങളെ ചോദ്യം ചെയ്തുകൊണ്ടാണ് ടിഎംസി നേതാക്കള് പ്രശ്നങ്ങള് സൃഷ്ടിച്ചത്. സങ്കല്പ് പത്രയില് സോനാര് ബംഗ്ല (സുവര്ണ ബംഗാള്) എന്നാണ് ബിജെപി വിശേഷിപ്പിച്ചത്. ബിമന്റെ തെരഞ്ഞെടുപ്പ് പ്രചരണ വേദിയില് ടിഎംസി അനുകൂലികള് ഇതിനെ ചോദ്യം ചെയ്ത് എത്തുകയും അത് വാക്കുതര്ക്കത്തിലേക്കും പിന്നീട് കൈയ്യാങ്കളിയിലേക്ക് നീങ്ങുകയുമായിരുന്നു.
അതേസമയം ദുര്ഗാപൂര് ബങ്കുരയില് കേന്ദ്ര ആഭ്യന്തരമന്ത്രി അമിത് ഷായുടെ റോഡ് ഷോയ്ക്ക് ശേഷവും ടിഎംസി അനുകൂലികള് പ്രശ്നങ്ങള് സൃഷ്ടിച്ചു. ടിഎംസിയുടെ ആക്രമണത്തില് രണ്ട് ബിജെപി പ്രവര്ത്തകര്ക്ക് പരിക്കേറ്റു. ഇരുവരേയും ദുര്ഗാപൂര് സബ് ഡിവിഷണല് ആശുപത്രിയില് പ്രവേശിപ്പിച്ചിരിക്കുകയാണ്. ബിജെപിയുടെ റോഡ് ഷോയിലെ പൊതുജനങ്ങളുടെ ഒഴുക്ക് കണ്ട് നിരാശരായാണ് ടിഎംസി ഇത്തരത്തില് ആക്രമണങ്ങള് നടത്തുന്നതെന്ന് ബിജെപി നേതാവ് അഭിജിത്ത് ദത്ത പറഞ്ഞു.
