കൊല്‍ക്കത്ത: നിയമസഭാ തെരഞ്ഞെടുപ്പ് പ്രവര്‍ത്തനങ്ങള്‍ വിലയിരുത്തുന്നതിനായി പ്രധാനമന്ത്രി നരേന്ദ്ര മോദി ബംഗാളിലെ ബിജെപി പ്രവര്‍ത്തകരുമായി സംവദിച്ചു.
മേരാ ബൂത്ത് സബ്സെ മസ്ബൂത്ത് സംവാദ് എന്ന് പേരിട്ട പരിപാടി നമോ ആപ്പ് വഴിയാണ് സംഘടിപ്പിച്ചത്. ബിജെപിയുടെ പ്രകടനപത്രികയ്‌ക്ക് സംസ്ഥാനത്തെ ജനങ്ങളില്‍ നിന്ന് വലിയ സ്വീകാര്യത ലഭിച്ചെന്ന് പറഞ്ഞ പ്രധാനമന്ത്രി ഇതുവരെയുള്ള തെരഞ്ഞെടുപ്പ് പ്രചരണ പ്രവര്‍ത്തനങ്ങളും വിലയിരുത്തി, ഓരോ ബൂത്തുകളിലേയും കാര്യങ്ങള്‍ ചര്‍ച്ച ചെയ്തു.
പാര്‍ട്ടി പ്രവര്‍ത്തകരില്‍ ഇപ്പോള്‍ കാണുന്ന ഊര്‍ജം, ഉത്സാഹം, ആവേശം എന്നിവ ശ്രദ്ധേയമാണ്, ഇവ എന്നെന്നും നിലനില്‍ക്കണം. ടിഎംസി സംസ്ഥാനത്ത് നടത്തിയ അഴിമതി ഭരണം ജനങ്ങള്‍ തിരിച്ചറിഞ്ഞ് കഴിഞ്ഞു. ഇവ ജനങ്ങളിലേക്ക് ഫലപ്രദമായി എത്തിക്കാന്‍ പാര്‍ട്ടി പ്രവര്‍ത്തകര്‍ക്ക് സാധിച്ചു, സംസ്ഥാനത്തെ ബിജെപിയുടെ പ്രചരണ പരിപാടികളിലെ ജനസാന്നിധ്യം ഇതാണ് സൂചിപ്പിക്കുന്നത്. സംസ്ഥാനത്തെ ബിജെപിയുടെ എല്ലാ പരിപാടികളിലും സമൂഹത്തിലെ എല്ലാ വിഭാഗങ്ങളും ആവേശത്തോടെ പങ്കെടുക്കുന്നുണ്ട്. സംസ്ഥാനത്തെ പാര്‍ട്ടി പ്രവര്‍ത്തകരുടെ പ്രവര്‍ത്തനങ്ങള്‍ മികച്ചതാണെന്നും മോദി അഭിനന്ദിച്ചു.
ടിഎംസിക്കെതിരെയുള്ള ബിജെപിയുടെ വെല്ലുവിളി കൂടുതല്‍ ശക്തമാക്കാനും മധ്യ- വടക്കന്‍ ബംഗാളില്‍ പാര്‍ട്ടിക്കുള്ള സ്വാധീനം മെച്ചപ്പെടുത്താനും ലക്ഷ്യമിട്ടാണ് പാര്‍ട്ടി ഇത്തരത്തില്‍ സംവാദം സംഘടിപ്പിച്ചത്.
