കോട്ടയം: സിപിഐ ഉള്പ്പടെയുള്ള എല്ഡിഎഫ് കക്ഷികളില് നിന്ന് ബിജെപിയിലേക്കുള്ള പ്രവര്ത്തകരുടെ ഒഴുക്കിനെ ഗൗരവമായാണ് കാണുന്നതെന്നു സിപിഐ സംസ്ഥാന സെക്രട്ടറി ബിനോയ് വിശ്വം.
വൈക്കത്തെ മുന് എംഎല്എ കെ. അജിത്ത്, മുന് എംഎല്എ പി. നാരായണന്റെ കുടുംബം എന്നിവരുള്പ്പടെ ഒട്ടേറെ സിപിഐക്കാര് ബിജെപിയില് ചേര്ന്നതുമായി ബന്ധപ്പെട്ട് മാധ്യമപ്രവര്ത്തകരുടെ ചോദ്യത്തിനു മറുപടി നല്കുകയായിരുന്നു ബിനോയ് വിശ്വം. വൈക്കത്ത് ഏതാനും പേര് മാത്രമേ സിപിഐ വിട്ട് ബിജെപിയില് ചേര്ന്നുള്ളൂ എന്ന് ആദ്യം അവകാശപ്പെട്ട ബിനോയ് വിശ്വം, ബിജെപിയിലേക്ക് കാര്യമായ ഒഴുക്കുണ്ടെന്നു പിന്നീട് സമ്മതിച്ചു.
സിപിഐയില് നിന്നുള്ള കൊഴിഞ്ഞുപോക്ക് തടയാന് പ്രവര്ത്തകരെ കമ്യൂണിസ്റ്റ് ആശയം നന്നായി പഠിപ്പിക്കുമെന്നും പാര്ട്ടി സെക്രട്ടറി പറഞ്ഞു. ശബരിമല സ്വര്ണക്കൊള്ള നിയമസഭാ തെരഞ്ഞെടുപ്പില് വളരെ പ്രധാന്യം കുറഞ്ഞ വിഷയം മാത്രമായാണ് സിപിഐ കാണുന്നത്. എന്നാല് അത് ചര്ച്ചയാകുന്നതിനെ ഭയപ്പെടുന്നില്ല. സ്വര്ണക്കൊള്ളക്കാരെ സോണിയാ ഗാന്ധിയുടെ അടുത്തെത്തിച്ചവര്ക്കാണ് ഭയം വേണ്ടതെന്നും അദ്ദേഹം പറഞ്ഞു.
