കൊല്ലം: ജില്ലയിലെ ആയിരക്കണക്കിന് പ്രവര്‍ത്തകര്‍ക്ക് അഭിമാനവും ആവേശവും ആശയറ്റവര്‍ക്ക് പ്രതീക്ഷാകേന്ദ്രവുമായി ബിജെപി ആസ്ഥാനമന്ദിരം ചിന്നക്കടയില്‍ പ്രവര്‍ത്തനമാരംഭിച്ചു. നഗരഹൃദയത്തില്‍ പണികഴിപ്പിച്ച കൊല്ലം വെസ്റ്റ് ജില്ലാ ഓഫീസ് ദീനദയാല്‍ ഭവന്റെ ഉദ്ഘാടനം സംസ്ഥാന അദ്ധ്യക്ഷന്‍ രാജീവ് ചന്ദ്രശേഖര്‍ നിര്‍വഹിച്ചു.
പുതിയ ഓഫീസ് കെട്ടിടത്തില്‍ ജനപ്രതിനിധികള്‍ക്കായി പ്രത്യേക സൗകര്യങ്ങളാണ് ഒരുക്കിയിരിക്കുന്നത്. വിവിധ കേന്ദ്രസര്‍ക്കാര്‍ പദ്ധതികള്‍ കാര്യക്ഷമമായി ജനങ്ങളിലേക്ക് എത്തിക്കുന്ന സഹായകേന്ദ്രമാണ് ഇവിടത്തെ ഹൈലൈറ്റ്. വിശാലമായ കോണ്‍ഫറന്‍സ് ഹാളുകളും പത്രസമ്മേളനത്തിനായി പ്രത്യേക മുറിയും അടക്കമുണ്ട്.
10,000 ചതുരശ്ര അടിവിസ്തീര്‍ണമുള്ള നാലുനില മന്ദിരത്തിന്റെ രണ്ടാംനിലയിലാണ് എംഎല്‍എ മുറി. പൊതുജനങ്ങളുമായി സംവദിക്കാനും പരാതികള്‍ സ്വീകരിക്കാനും ജനപ്രതിനിധികള്‍ക്ക് സ്ഥിരമായ ഒരു സംവിധാനം ഒരുക്കുകയെന്ന ലക്ഷ്യത്തോടെയുമാണ് ആസ്ഥാന മന്ദിരം യാഥാര്‍ത്ഥ്യമാക്കിയത്. ഗ്രൗണ്ട് ഫ്ളോറില്‍ പാര്‍ക്കിങ് സൗകര്യവും കേന്ദ്ര സര്‍ക്കാര്‍ പദ്ധതികളെക്കുറിച്ച് പൊതുജനങ്ങള്‍ക്ക് അറിവ് നല്‍കുന്നതിനുള്ള ഹെല്‍പ്പ് ഡെസ്‌കുമുണ്ട്. ഒന്നാംനിലയില്‍ ജില്ലാ പ്രസിഡന്റ്, ജനറല്‍ സെക്രട്ടറിമാര്‍, ട്രഷറര്‍ എന്നിവരുടെ ഓഫീസുകളും രണ്ടാംനിലയില്‍ ജനപ്രതിനിധികളുടെ മുറികള്‍, ലൈബ്രറി, മോര്‍ച്ച ഭാരവാഹികളുടെ ഇരിപ്പിടങ്ങള്‍, മിനി കോണ്‍ഫറന്‍സ് ഹാള്‍, ഡൈനിങ് സൗകര്യം എന്നിവയും ഒരുക്കിയിട്ടുണ്ട്.
നാലാംനിലയില്‍ 200 പേര്‍ക്ക് ഇരിക്കാവുന്ന കോണ്‍ഫറന്‍സ് ഹാളുമുണ്ട്. പുതിയ ജില്ലാ ഓഫീസ് ഉദ്ഘാടനം ആവേശത്തോടെയാണ് പ്രവര്‍ത്തകര്‍ ഏറ്റെടുത്തത്. നൂറുകണക്കിന് പ്രവര്‍ത്തകരും അനുഭാവികളും പങ്കെടുത്ത ചടങ്ങ് ഉത്സവാന്തരീക്ഷം തീര്‍ത്തു. ജില്ലയില്‍ പാര്‍ട്ടിയുടെ പ്രവര്‍ത്തനങ്ങള്‍ കൂടുതല്‍ ശക്തിപ്പെടുത്താനും ജനങ്ങളുമായി കൂടുതല്‍ ഊഷ്മളമായ ബന്ധം സ്ഥാപിക്കാനും പുതിയ ഓഫീസ് സഹായകരമാകും.
