ടെഹ്റാൻ : യുഎസ് പ്രസിഡന്റ് ഡൊണാൾഡ് ട്രംപ് തിങ്കളാഴ്ച നടത്തിയ യുദ്ധ വിരാമ പ്രഖ്യാപനത്തിനെതിരെ ടെഹ്റാൻ. ഇറാനെതിരായ ആക്രമണം അഞ്ച് ദിവസത്തേക്ക് നിർത്തുമെന്ന് ട്രംപ് പറഞ്ഞിരുന്നു. അടുത്ത അഞ്ച് ദിവസത്തേക്ക് ടെഹ്‌റാനെ ആക്രമിക്കരുതെന്ന് തന്റെ യുദ്ധ വകുപ്പിന് നിർദ്ദേശം നൽകിയിട്ടുണ്ടെന്നാണ് ട്രംപ് പറഞ്ഞത്. കൂടാതെ കഴിഞ്ഞ രണ്ട് ദിവസങ്ങളിലായി അമേരിക്കയും ഇറാനും തമ്മിൽ നല്ല ചർച്ചകൾ നടന്നിട്ടുണ്ടെന്നും ട്രംപ് അവകാശപ്പെട്ടിരുന്നു.
എന്നാൽ ഇപ്പോൾ ട്രംപിന്റെ ഈ അവകാശവാദം ഇറാൻ നിരസിച്ചു. ട്രംപിന്റെ ഭീഷണിക്ക് ശേഷം, ശക്തമായ പ്രതികാര നടപടിയുണ്ടാകുമെന്ന് ടെഹ്റാൻ മുന്നറിയിപ്പ് നൽകിയിരുന്നുവെന്ന് ഇറാൻ പറയുന്നു. ഇറാന്റെ ഉദ്ദേശ്യങ്ങൾ ശക്തമാണെന്നും അവർ ശക്തമായി തിരിച്ചടിക്കുമെന്നും ട്രംപ് മനസ്സിലാക്കി. അതുകൊണ്ടാണ് അദ്ദേഹം തന്റെ അന്ത്യശാസന പ്രസ്താവനയിൽ നിന്ന് പിന്മാറിയത്. ഇറാനിയൻ മാധ്യമങ്ങൾ പറയുന്നതനുസരിച്ച് ഈ വിഷയത്തിൽ ട്രംപുമായി ഒരു ചർച്ചയും നടത്തിയിട്ടില്ലെന്നും ടെഹ്റാൻ പറഞ്ഞിട്ടുണ്ട്.
നേരത്തെ യുഎസ് പ്രസിഡന്റ് ഡൊണാൾഡ് ട്രംപ് ഇറാനെതിരെ ഗുരുതരമായ ഭീഷണി മുഴക്കിയിരുന്നു. അടുത്ത 48 മണിക്കൂറിനുള്ളിൽ ഇറാൻ ഹോർമുസ് കടലിടുക്ക് തുറന്നില്ലെങ്കിൽ, ടെഹ്‌റാനിൽ വൻ ആക്രമണം നടത്തുമെന്ന് ട്രംപ് പറഞ്ഞിരുന്നു. ഈ ആക്രമണത്തിൽ യുഎസ് സൈന്യം ഇറാന്റെ പവർ ഗ്രിഡും പവർ പ്ലാന്റുകളും ലക്ഷ്യമിടുന്നതായി യുഎസ് പറഞ്ഞിരുന്നു.
ട്രംപിന്റെ ഭീഷണിക്ക് മറുപടിയായി ട്രംപ് അങ്ങനെ ചെയ്താൽ അമേരിക്കയുടെ മുഴുവൻ പവർ നെറ്റ്‌വർക്കും നശിപ്പിക്കുമെന്ന് ഇറാൻ പറഞ്ഞിരുന്നു. ഇതിനർത്ഥം മിഡിൽ ഈസ്റ്റിലുടനീളമുള്ള യുഎസ് പവർ പ്ലാന്റുകളെ ലക്ഷ്യമിടുമെന്നാണ് ഇറാൻ ഭീഷണി മുഴക്കിയത്.
