പോലീസുകാരുടെ മേയ്‌ക്കപ്പ്, കിണര്‍ഗോലുവിന്റെ ഡയറക്ഷന്‍… സ്റ്റാര്‍ട്ട്, ആക്ഷന്‍ പറയും മുമ്പേ കട്ടായ ഒരു നാടകമാണ് കേരളത്തിന്റെ മുന്നില്‍ ഇപ്പോള്‍ തുണിയുരിഞ്ഞു വീണ ഉളുപ്പില്ലാത്ത കഴുത്തുളുക്കല്‍… കഴുത്ത് വേദനിക്കുന്നു സിഎമ്മേ എന്ന് വീണ കണ്ണീരണിയുന്നു. വിവരമറിഞ്ഞപാടെ കുതിച്ചെത്തിയ പിണറായി വിജയന് മുന്നില്‍ വേദനകൊണ്ട് ഞെരിപിരി കൊള്ളുന്ന മന്ത്രിണിക്കു മുന്നില്‍ വികാരാര്‍ദ്രനാകുന്നു. കഴുത്തും കൈയും പിടിച്ച് തിരിച്ചെന്ന് ഗോവിന്ദന്‍ സഖാവ് ഗദ്ഗദകണ്ഠനാകുന്നു. എല്ലാവരും തകര്‍ത്തുപിടിച്ച് അഭിനയിക്കുകയാണ്.
കേരളത്തിനൊരു കപ്പിത്താനുണ്ട് സാര്‍… എന്ന നിയമസഭയിലെ നിലവിളിയൊച്ചയില്‍ അറിയേണ്ടതായിരുന്നു ഇതിങ്ങനെയൊക്കെയേ സംഭവിക്കൂ എന്ന്. ചാനലുദ്യോഗകാലത്തേ ക്യാമറയ്‌ക്ക് മുന്നില്‍ തേഞ്ഞുളുക്കുന്നതാണ് കേരളത്തിലെ ആരോഗ്യ മന്ത്രിണിയുടെ ശീലം.
ഭരിക്കാന്‍ കിട്ടിയ വകുപ്പാകെ കഴുത്തൊടിഞ്ഞ് ഊര്‍ധ്വന്‍ വലിക്കുമ്പോഴാണ് മന്ത്രി വീണാ ജോര്‍ജിന്റെ കഴുത്തുളുക്കുന്നത്. ഒന്നാം പിണറായി സര്‍ക്കാരിലെ ടീച്ചറമ്മയ്‌ക്ക് തള്ളും പൊങ്ങച്ചവുമായിരുന്നു ഹോബിയെങ്കില്‍ ഇപ്പോള്‍ അത് പച്ചക്കള്ളമെഴുന്നെള്ളിക്കലായെന്നേ ഉള്ളൂ. പൊളിഞ്ഞുവീഴുന്ന ആശുപത്രിക്കെട്ടിടങ്ങളും കത്രികയടക്കമുള്ളതുവച്ച് തുന്നിക്കെട്ടിയുള്ള ശസ്ത്രക്രിയകളുമൊക്കെയായി ആരോഗ്യരംഗം കുതിച്ചുകയറുന്നതിനിടെയാണിത്. ജനങ്ങള്‍ ഇതൊക്കെക്കണ്ട് പ്രകോപിതരാകുമെന്ന് വന്നപ്പോഴാണ് സതീശന്റെ പിള്ളേര്‍ നടികര്‍ക്ക് വേദിയൊരുക്കിക്കൊടുത്തത്. ഫലത്തില്‍ കോണ്‍ഗ്രസ് കുഞ്ഞന്‍മാര്‍ കെട്ടിയ സ്റ്റേജില്‍ ഇടത് വില്ലന്മാരുടെ കോമിക് ഡാന്‍സ്. കീരിക്കാടന്‍ ജോസും ഭീമന്‍ രഘുവും സ്ഫടികം ജോര്‍ജുമൊക്കെയാണ് കടുകിട്ട് വറക്കലും കുടുക്കിട്ടുവലിക്കലുമായി അരങ്ങ് നിറയുന്നത്.
തെരഞ്ഞെടുപ്പ് കാലമായതോടെ പലതാണ് വേഷങ്ങള്‍. പുതുയുഗം ഇപ്പോള്‍ വരുമെന്ന് ആക്രാന്തം പിടിച്ച് സതീശന്‍ നടത്തുന്ന യാത്ര വടകര മേഖലയില്‍ എത്തിയപ്പോള്‍ നടികര്‍ തിലകം പറമ്പില്‍ ഷാഫിയുടെ തിരക്കിനിടയിലെ വെപ്രാളം കണ്ട് ചിരിച്ച മലയാളികള്‍ ഇതും കാണും ഇതിനപ്പുറവും കാണും. എം.എ. ബേബിയെയും കെ.സി. വേണുഗോപാലിനെയും പോലെയുള്ള അഖിലേന്ത്യന്മാര്‍ ഇന്‍ഡി നേതാവിന്റെ തൈര് വെങ്കായം ഉപ്പ് കോമാളിക്കളിയുടെ ചുവടുപിടിച്ച് അടുക്കളകളില്‍ കയറി പാത്രം മോറിയും കപ്പയിളക്കിയും കോമഡി ഷോ നടത്തുമ്പോള്‍ ഒന്നുളുക്കുകയെങ്കിലും ചെയ്തില്ലെങ്കില്‍ പിന്നെ പറഞ്ഞിട്ട് കാര്യമുണ്ടോ!
അമ്പലപ്പറമ്പുകളില്‍ കലാപരിപാടികള്‍ പത്ത് മണിക്ക് നിര്‍ത്തിക്കോണമെന്നും ബാറുകളിലെ കലാപ പരിപാടികള്‍ പന്ത്രണ്ട് മണിവരെയാകാമെന്നും ഉത്തരവിടുന്ന കപ്പിത്താന്‍ പാര്‍ട്ട് കലാകാരന്‍, വീണയും ഷാഫിയും അടക്കമുള്ള നടീനടന്മാരുടെ വിരുതിന് നേരവും കാലവും നിശ്ചയിക്കരുതെന്നാണ് അപേക്ഷ.
ജന്മഭൂമി ഓണ്‍ലൈന്‍