കൊച്ചി : കോണ്ഫിഡന്റ് ഗ്രൂപ്പ് ഉടമ ഡോ സി ജെ റോയി ജീവനൊടുക്കിയത് ആദായ നികുതി വകുപ്പിന്റെ റെയ്ഡ് മൂലമല്ലെന്ന് കമ്പനി എം ഡി ടി എ ജോസഫ്.ബെംഗളൂരുവിലെ കോണ്ഫിഡന്റ് ഗ്രൂപ്പ് ഓഫീസില് നടന്നത് പതിവ് ഐടി പരിശോധനയാണ്.പരിശോധനയില് ബുദ്ധിമുട്ട് ഉണ്ടായിട്ടില്ലെന്നും ആദായ നികുതി വകുപ്പ് ഉദ്യോഗസ്ഥരുമായി സഹകരിച്ചുവെന്നും അദ്ദേഹം പറഞ്ഞു.
ആദായനികുതി വകുപ്പ് ഉദ്യോഗസ്ഥര് പീഡിപ്പിച്ചിട്ടില്ല. റോയിയുടെ മരണത്തിന് പിന്നില് ആദായനികുതി വകുപ്പ് ഉദ്യോഗസ്ഥരെന്ന് സഹോദരന് പ്രതികരിച്ചത് താന് ഇടപെട്ട് തിരുത്തിയെന്നും ടി എ ജോസഫ് പറഞ്ഞു. സഹോദരന് വൈകാരികമായി പ്രതികരിച്ചതാകാം.
കോണ്ഫിഡന്റ് ഗ്രൂപ്പ് നിയമപരമായാണ് പ്രവര്ത്തിക്കുന്നത്. കമ്പനിക്ക് നിക്ഷേപകരോട് ഉത്തരവാദിത്തമുണ്ട്.ആരെയും കബളിപ്പിക്കുകയോ മുതലെടുക്കുകയോ ചെയ്തിട്ടില്ല. സിനിമാ മേഖലയില് ആര്ക്കും പണം നല്കാനില്ലെന്നും കമ്പനിയുടെ പ്രവര്ത്തനങ്ങള് സുതാര്യമാണെന്നും ടി എ ജോസഫ് പറഞ്ഞു.മോഹന്ലാലുമായി ഉളളത് കാസനോവ സിനിമ നിര്മ്മിച്ചു എന്ന ബന്ധമാണ്. ആന്റണി പെരുമ്പാവൂര് കുടുംബ സുഹൃത്താണ്.
എല്ലാ ദിവസവും ജീവിതം ആഘോഷിക്കുക എന്നതായിരുന്നു ഡോ സി ജെ റോയിയുടെ തിയറി. അന്വേഷണം എസ്ഐടിയുടെ പരിധിയിലുള്ളതുകൊണ്ട് കൂടുതല് കാര്യങ്ങള് സംസാരിക്കാനാവില്ലെന്നും ടി എ ജോസഫ് പറഞ്ഞു.
ചില യൂട്യൂബ് ചാനലുകള് മോശമായ കാര്യങ്ങള് ചെയര്മാനെ കുറിച്ച് പ്രചരിപ്പിച്ചു. ഇഡി റെയ്ഡ് നടന്നിട്ടില്ല. പല യൂട്യൂബ് ചാനലുകളും ചെയര്മാന്റെ മരണത്തിനു ശേഷവും അദ്ദേഹത്തെ കഴുകന്മാരെ പോലെ വലിച്ചുകീറുന്നു.ജിഎസ്ടിയുടെയും ഇന്കം ടാക്സിന്റെയും സാധാരണ പരിശോധനയാണ് നടന്നത്. കള്ളക്കടത്ത് , ബിനാമി , കള്ളപ്പണം എന്നിവ ഉണ്ടെന്ന് വരുത്തി തീര്ക്കാന് ശ്രമം നടന്നതായും ടിഎ ജോസഫ് പറഞ്ഞു. കമ്പനി ബാങ്കില് നിന്നോ, പ്രൈവറ്റ് ഫിനാന്സില് നിന്നോ ഒന്നും പണം കടമെടുത്തിട്ടില്ല. കമ്പനിക്ക് ബാധ്യതകളോ വായ്പയോ ഇല്ലെന്ന് ടി എ ജോസഫ് പറഞ്ഞു.
കമ്പനിയുടെ എല്ലാ പ്രവര്ത്തനങ്ങളും സാധാരണ രീതിയില് പുരോഗമിക്കുന്നു. ചെയര്മാന്റെ മരണം കമ്പനിയുടെ പ്രവര്ത്തനത്തെ ബാധിക്കില്ലെന്നും ആരും ആശങ്കപ്പെടേണ്ടതില്ലെന്നും ടി എ ജോസഫ് വ്യക്തമാക്കി. നിക്ഷേപകരുടെ പണം സുരക്ഷിതമാണ്.
മാനസിക സമ്മര്ദ്ദം പല രീതിയില് ഉണ്ടാകാം. ഒരാളും ഡോ സി ജെ റോയിയെ ഭീഷണിപ്പെടുത്തിയിട്ടില്ലെന്ന് ടി എ ജോസഫ് പറഞ്ഞു.ഡയറി എഴുതിയത് കുടുംബത്തിന് വേണ്ടിയാണ്. അതും എസ്ഐടിക്ക് നല്കി.സാമ്പത്തികമായും കുടുംബത്തിലും വ്യക്തിപരമായും മറ്റ് പ്രശ്നങ്ങളൊന്നും ഉണ്ടായിരുന്നില്ലെന്ന് ടി എ ജോസഫ് പറഞ്ഞു.
