കൊട്ടാരക്കര: ദേശീയപാതയിൽ ബൈക്കുകൾ കൂട്ടിയിടിച്ച് കത്തി രണ്ടു യുവാക്കൾക്ക് ദാരുണാന്ത്യം. രണ്ടുപേർ ഗുരുതര പരിക്കുകളോടെ ആശുപത്രിയിൽ ചികിത്സയിലാണ്. കൊല്ലം എഴുകോൺ അമ്പലത്തുകാല കാർത്തികഭവനിൽ അഭിഷേക്(24,) മൈലം സ്വദേശി സിദ്ധിവിനായക് എന്നിവരാണ് മരിച്ചത്. നീലേശ്വരം അമ്മുമ്മമുക്ക് സ്വദേശി ജീവൻ (21), സനൂപ് (21) എന്നിവർക്കണ് പരിക്കേറ്റത്.
നെടുവത്തൂരിൽ താമരശ്ശേരി ജംക്ഷനു സമീപം ഇന്നലെ രാത്രി 10.30ന് ആണ് അപകടമുണ്ടായത്. എതിർദിശകളിൽനിന്നു വന്ന ബൈക്കുകൾ നേർക്കുനേർ കൂട്ടിയിടിക്കുകയായിരുന്നു. ഇന്ധനച്ചോർച്ചയുണ്ടായതോടെയാണു വാഹനത്തിനു തീപിടിച്ചത്.
അമിതവേഗത്തിൽ എതിരേയെത്തിയ ബൈക്കുകൾ കൂട്ടിയിടിച്ചതിൽ ഒരെണ്ണം കത്തുകയായിരുന്നെന്ന് നാട്ടുകാർ പറയുന്നു. കത്തിയ ബൈക്കിലുണ്ടായിരുന്ന അഭിഷേക് തത്ക്ഷണം വെന്തുമരിച്ചു. മറ്റുള്ളവർക്ക് അപകടത്തിൽ തെറിച്ചുവീണാണ് പരിക്കേറ്റത്. അഗ്നിരക്ഷാസേനയെത്തി തീ അണച്ചശേഷമാണ് അഭിഷേകിന്റെ മൃതദേഹം ആശുപത്രിയിലേക്കു മാറ്റിയത്.
