ടെഹ്റാൻ: ഇറാനിൽ നടന്നുകൊണ്ടിരിക്കുന്ന പ്രതിഷേധങ്ങളിൽ മരിച്ചവരുടെ എണ്ണം 12,000 ആയി ഉയർന്നതായി റിപ്പോർട്ടുകൾ സൂചിപ്പിക്കുന്നു. ഇറാൻ ഇന്റർനാഷണൽ എന്ന പ്രതിപക്ഷ വെബ്സൈറ്റാണ് ഈ അവകാശവാദം ഉന്നയിച്ചിരിക്കുന്നത്. ഇറാന് പുറത്ത് നിന്ന് പ്രവർത്തിക്കുന്ന ഈ വെബ്സൈറ്റ് രാജ്യവ്യാപകമായി സർക്കാർ വിരുദ്ധ പ്രതിഷേധങ്ങൾക്കെതിരെ നടന്ന അടിച്ചമർത്തലിനിടെ സുരക്ഷാ സേന നടത്തിയ വെടിവയ്പ്പിൽ കുറഞ്ഞത് 12,000 പേർ കൊല്ലപ്പെട്ടതായിട്ടായിട്ടാണ് റിപ്പോർട്ട് ചെയ്തിരിക്കുന്നത്.
ഇറാന്റെ ചരിത്രത്തിലെ ഏറ്റവും വലിയ കൂട്ടക്കൊലയെന്നാണ് വെബ്സൈറ്റ് ഇതിനെ വിശേഷിപ്പിച്ചത്. എന്നിരുന്നാലും ഇറാനിലെ പ്രതിഷേധങ്ങളിൽ ഇതുവരെ ഏകദേശം 2,000 പേർ മരിച്ചുവെന്ന് പറയുന്ന ആഗോള വാർത്താ ഏജൻസികൾ നൽകിയ കണക്കുകളിൽ നിന്ന് ഈ കണക്ക് തികച്ചും വ്യത്യസ്തമാണ്.
ഇറാനിലെ മരണസംഖ്യ എത്രയാണ് ?
ഇതുവരെ റിപ്പോർട്ട് ചെയ്യപ്പെട്ടതിനേക്കാൾ വളരെ കൂടുതലാണ് ഇറാൻ ഇന്റർനാഷണലിന്റെ കണക്ക്. സ്ഥിരീകരിച്ച മരണസംഖ്യയിൽ ഗണ്യമായ കുറവുണ്ടെന്ന് മനുഷ്യാവകാശ ഗ്രൂപ്പുകളും മാധ്യമങ്ങളും റിപ്പോർട്ട് ചെയ്തിട്ടുണ്ട്. എന്നിരുന്നാലും, ഇറാനിലെ ഇന്റർനെറ്റ് ഉപരോധങ്ങളും മാധ്യമ നിയന്ത്രണങ്ങളും കാരണം ഈ കണക്കുകളുടെ സ്വതന്ത്ര സ്ഥിരീകരണം ഇപ്പോഴും ബുദ്ധിമുട്ടാണെന്ന് അവർ പറഞ്ഞു.
ജനുവരി 8, 9 തീയതികളിലെ രാത്രികളിൽ ഇസ്ലാമിക് റെവല്യൂഷണറി ഗാർഡ് കോർപ്സും ബാസിജ് ഫോഴ്സും നടത്തിയ ഷെല്ലാക്രമണത്തിലാണ് മിക്ക മരണങ്ങളും സംഭവിച്ചതെന്ന് ഇറാൻ ഇന്റർനാഷണൽ പറയുന്നു. കഴിയുന്നത്ര ആളുകളെ കൊല്ലുക എന്ന ലക്ഷ്യത്തോടെ വെടിവയ്പ്പ് മനഃപൂർവമായിരുന്നുവെന്നും അതിൽ പറയുന്നു.
ഏറ്റവും കൂടുതൽ പേർ മരിച്ചത് ഐആർജിസി വെടിവയ്പ്പിൽ
ഇറാന്റെ പരമോന്നത നേതാവ് ആയത്തുള്ള അലി ഖമേനിയുടെ നിർദ്ദേശപ്രകാരം ഇസ്ലാമിക് റെവല്യൂഷണറി ഗാർഡ് കോർപ്സും ബാസിജ് ഫോഴ്സും നേരിട്ട് വെടിവയ്പ്പ് നടത്തിയെന്നും മാധ്യമം അവകാശപ്പെട്ടു. ഇറാന്റെ പരമോന്നത ദേശീയ സുരക്ഷാ കൗൺസിൽ നേരിട്ട് വെടിവയ്പ്പിന് അനുമതി നൽകിക്കൊണ്ടുള്ള ഉത്തരവ് പുറപ്പെടുവിച്ചതായി റിപ്പോർട്ടിൽ പറയുന്നു.
ഇറാന്റെ സ്വന്തം സുരക്ഷാ ഏജൻസികളുടെ കൈവശമുള്ള ഡാറ്റയെ അടിസ്ഥാനമാക്കിയാണ് കുറഞ്ഞത് 12,000 മരണങ്ങളെങ്കിലും ഉണ്ടായതായി ഇറാൻ ഇന്റർനാഷണൽ പറഞ്ഞു. ഒന്നിലധികം സ്രോതസ്സുകളുടെ സഹായത്തോടെ കണക്കുകൾ സമാഹരിച്ച് പരിശോധിച്ചതായും അതിൽ പറയുന്നു. പണപ്പെരുപ്പത്തിനും കറൻസി മൂല്യത്തകർച്ചയ്ക്കുമെതിരെയാണ് ഇറാനിൽ രാജ്യവ്യാപകമായി പ്രതിഷേധങ്ങൾ അലയടിക്കുന്നത്.
