സിഡ്‌നി: ആഷസ് ടെസ്റ്റ് പരമ്പരയുടെ അവസാന മത്സരത്തിന്റെ ആദ്യ ഇന്നിങ്‌സില്‍ ഇംഗ്ലണ്ടിനുള്ള ഓസീസ് മറുപടി ഉജ്ജ്വല തുടക്കത്തോടെ. ഒന്നര ദിവസത്തിലേറെ സമയംകൊണ്ട് വിരുന്നുകാരായ ഇംഗ്ലണ്ട് 384 റണ്‍സെടുത്ത് എല്ലാവരും പുറത്തായി. ഇതിനെതിരെ രണ്ടാം ദിനം കളി നിര്‍ത്തുമ്പോള്‍ ആതിഥേയരായ ഓസ്‌ട്രേലിയ രണ്ട് വിക്കറ്റ് നഷ്ടത്തില്‍ 166 എന്ന ശക്തമായ നിലയിലാണ്. 34.1 ഓവറിലാണ് ഓസീസ് ഇത്രയും റണ്‍സെടുത്തിരിക്കുന്നത്.
ഓസീസ് സ്‌കോറിങ്ങിന് ബലം പകര്‍ന്ന് ഓപ്പണര്‍ ട്രാവിസ് ഹെഡ്(91) സെഞ്ചുറിയോടടുത്തുകൊണ്ട് ക്രീസിലുണ്ട്. കൂടെയുള്ളത് നൈറ്റ് വാച്ച്മാനായി ഇറങ്ങിയ പേസ് ബൗളര്‍ മൈക്കല്‍ നെസര്‍(ഒന്ന്). ഓപ്പണര്‍ ജെയ്‌ക്ക് വെതറാള്‍ഡും(21) മാര്‍നസ് ലഭൂഷെയ്‌നും(48) പുറത്തായ ഓസ്‌ട്രേലിയന്‍ ബാറ്റര്‍മാര്‍. ലഭൂഷെയ്‌നും ഹെഡും ചേര്‍ന്ന് മികച്ച അടിത്തറയാണ് ഓസീസിനിട്ടുകൊടുത്തിരിക്കുന്നത്. രണ്ടാം വിക്കറ്റില്‍ ഇവര്‍ ഒരുമിച്ച് 105 റണ്‍സ് നേടിയെടുത്തു.
മുന്‍നിര ബൗളര്‍മാരെല്ലാം പരിക്ക് കാരണം പുറത്താകേണ്ടിവന്നത് അഞ്ചാം മത്സരത്തില്‍ ഇംഗ്ലണ്ടിന് വലിയ തിരിച്ചടിയായി. ബെന്‍ സ്റ്റോക്‌സിന് മാത്രമാണ് ഇതുവരെ രണ്ട് വിക്കറ്റ് നേടാന്‍ സാധിച്ചത്.
നേരത്തെ തലേന്നത്തെ സ്‌കോറിനോട് 173 റണ്‍സ് കൂടി ചേര്‍ത്തുകൊണ്ട് ഇംഗ്ലണ്ട് ഇന്നിങ്‌സ് അവസാനിച്ചു. മൂന്നിന് 211 റണ്‍സെന്ന നിലയില്‍ ബാറ്റിങ് ആരംഭിച്ച ഇംഗ്ലണ്ടിനായി ക്രീസിലുണ്ടായിരുന്ന ഹാരി ബ്രൂക്ക്(84) കൂടുതല്‍ സമയം പിടിച്ചു നിന്നില്ല. സെഞ്ചുറി പ്രകടനത്തോടെ മുന്നേറിയ ജോ റൂട്ടിന്റെ ഇന്നിങ്‌സ് ആണ് ഇംഗ്ലണ്ടിന്റെ ഭേദപ്പെട്ട ടോട്ടലിന്റെ അടിത്തറയായത്. 242 പന്തുകള്‍ നേരിട്ട റൂട്ട് 15 ബൗണ്ടറികള്‍ സഹിതം 160 റണ്‍സ് നേടി ഒമ്പതാമനായാണ് പുറത്തായത്. റൂട്ടിന് ശേഷം ഒരു റണ്‍ പോലും കൂട്ടിചേര്‍ക്കാതെ രണ്ടാം പന്തില്‍ ഇംഗ്ലണ്ടിന്റെ ആദ്യ ഇന്നിങ്‌സ് അവസാനിച്ചു. ഹാരി ബ്രൂക്കിന് ശേഷം വിക്കറ്റ് കീപ്പര്‍ ജാമീ സ്മിത്തും(46) വില്‍ ജാക്‌സും(27) മികച്ച പോരാട്ടവീര്യം കാട്ടി. ഓസ്‌ട്രേലിയക്കായി നെസര്‍ നാല് വിക്കറ്റ് നേടി. മറ്റ് ബൗളര്‍മാരില്‍ മിച്ചല്‍ സ്റ്റാര്‍ക്കും സ്‌കോട്ട് ബോളണ്ടും രണ്ട് വീതം വിക്കറ്റുകള്‍ നേടി.
