കൊച്ചി: മൂവാറ്റുപുഴയില്‍ പായിപ്ര പഞ്ചായത്തില്‍ അസിസ്റ്റന്റ് എന്‍ജിനീയറും മുസ്ലീം ലീഗ് നേതാവും തമ്മില്‍ ഉണ്ടായ തര്‍ക്കത്തില്‍ പൊലിസ് കേസ് എടുത്തു. അസിസ്റ്റന്റ് എന്‍ജിനീയര്‍ സുമിയയുടെ പരാതിയില്‍ മുസ്ലീം ലീഗ് നേതാവും പഞ്ചായത്തംഗവുമായ അബ്ദുള്‍ കരീമിനെതിരെയാണ് കേസെടുത്തത്.
സ്വകാര്യ സ്‌കൂളിന്റെ ഫിറ്റ്നസ് പുതുക്കുന്നതുമായി ബന്ധപ്പെട്ടാണ് തര്‍ക്കം ഉണ്ടായത്. പഞ്ചായത്ത് പരിധിയിലുള്ള സ്‌കൂളിന്റെ ഫിറ്റ്നസ് പുതുക്കുന്നതിനുള്ള അപേക്ഷയില്‍ നിയമപ്രകാരം കെഎസ്ഇബിയുടെ എന്‍ഒസി ആവശ്യമാണെന്ന് അസിസ്റ്റന്റ് എന്‍ജിനീയര്‍ ആവശ്യപ്പെട്ടതാണ് അബ്ദുള്‍ കരീമിനെ പ്രകോപിപ്പിച്ചത്.
അസിസ്റ്റന്റ് എന്‍ജിനീയര്‍ ആദ്യം പരാതി നല്‍കിയെങ്കിലും, അതിന് മുമ്പേ പഞ്ചായത്ത് പ്രസിഡന്റ് സീനത്ത് അസീസ് ആശുപത്രിയില്‍ പ്രവേശിച്ച് നല്‍കിയ എതിര്‍ പരാതിയിലാണ് പൊലിസ് ആദ്യം എഫ്ഐആര്‍ ഇട്ടത്. വനിതാ ഉദ്യോഗസ്ഥ മര്‍ദിച്ചു എന്നാണ് പഞ്ചായത്ത് പ്രസിഡന്റിന്റെ പരാതി.
സ്വകാര്യ സ്‌കൂളിന് ഫിറ്റ്നസ് നല്‍കാന്‍ കഴിയാത്ത പക്ഷം കാരണം വ്യക്തമാക്കി ഫയല്‍ ഉപയോക്താവിന് മടക്കി നല്‍കണമെന്ന് പഞ്ചായത്ത് സെക്രട്ടറി അസിസ്റ്റന്റ് എന്‍ജിനീയറോട് ആവശ്യപ്പെട്ടിരുന്നു.പഞ്ചായത്ത് പ്രസിഡന്റ് നേരിട്ട് അസിസ്റ്റന്റ് എന്‍ജിനീയറെ കണ്ട് സ്‌കൂളിന്റെ ഫിറ്റ്നസ് നല്‍കാത്തതിന് കാരണം വ്യക്തമാക്കണമെന്നും ഇല്ലെങ്കില്‍ ഫയല്‍ ഉപയോക്താവിന് മടക്കി നല്‍കണമെന്ന് ആവശ്യപ്പെടുകയും ചെയ്തു. പ്രകോപിതയായ അസിസ്റ്റന്റ് എന്‍ജിനീയര്‍ അപമര്യാദയായി പെരുമാറുകയും കൈയേറ്റം ചെയ്യാന്‍ ശ്രമിക്കുകയുമായിരുന്നുവെന്നാണ് പ്രസിഡന്റിന്റെ ആരോപണം.
എന്നാല്‍, പഞ്ചായത്ത് അംഗങ്ങളെ സംരക്ഷിക്കാനാണ് പൊലിസ് ശ്രമിക്കുന്നതെന്നും തനിക്ക് നീതി ലഭിക്കുന്നില്ലെന്നും അസിസ്റ്റന്റ് എന്‍ജിനീയര്‍ പറഞ്ഞു. അബ്ദുള്‍ കരീമും പഞ്ചായത്തംഗങ്ങളും ഭീഷണിപ്പെടുത്തുന്ന വീഡിയോ ഉദ്യോഗസ്ഥ പുറത്തുവിട്ടിരുന്നു.
