മോസ്കോ: വെനസ്വേലയെ ആക്രമിക്കുകയും അവിടുത്തെ പ്രസിഡന്‍റ് നിക്കോളാസ് മഡൂറോയെ തടവുകാരനായി പിടിക്കുകയും ചെയ്ത യുഎസ് നീക്കത്തിനെതിരെ ശക്തമായി പ്രതിഷേധിച്ച് റഷ്യ. ഇത് ആയുധം ഉപയോഗിച്ചുള്ള കടന്നാക്രമണമാണെന്ന് പുടിന്‍ വിമര്‍ശിച്ചു.
യുഎസ് ആക്രമണത്തിന് ശേഷം നിക്കോളാസ് മഡൂറോയെയും ഭാര്യ സിലിയയെയും ബന്ദികളാക്കി പിടിച്ച് വെനസ്വേലയില്‍ നിന്നും പുറത്തേക്ക് കൊണ്ടുപോയി എന്ന വാര്‍ത്ത അമ്പരപ്പിക്കുന്നതാണെന്നും റഷ്യ അഭിപ്രായപ്പെട്ടു. റഷ്യയുടെ അടുത്ത സഖ്യകക്ഷികളില്‍ ഒരാളാണ് വെനസ്വേലയുടെ മഡൂറോയെങ്കിലും യുഎസ് ആക്രമണത്തിനെതിരെ റഷ്യ വെനസ്വേലയ്‌ക്ക് സായുധപിന്തുണ നല്‍കിയിരുന്നില്ല.
മയക്കമരുന്ന് ടെററിസം പ്രോത്സാഹിപ്പിക്കുന്നു എന്ന് ആരോപിച്ചാണ് യുഎസ് സേന വെനസ്വേലയെ ആക്രമിച്ചത്. വെനസ്വേലയില്‍ നിന്നുള്ള മയക്കമരുന്ന് ലോബികളെ മഡൂറോ പ്രോത്സാഹിപ്പിക്കുന്നുവെന്നും ഈ മയക്കമരുന്ന് ലോബികള്‍ യുഎസിനെ നശിപ്പിക്കുകയാണെന്നും ട്രംപ് ആരോപിച്ചിരുന്നു. ശനിയാഴ്ചയാണ് ഒരു വ്യോമാക്രമണത്തിലൂടെ അമേരിക്കന്‍ സൈന്യം വെനസ്വേലയില്‍ കയറി മഡൂറോയെയും ഭാര്യയേയും തടവുകാരായി പിടിച്ചത്.
