തിരുവനന്തപുരം:തിരുവനന്തപുരം കോര്‍പറേഷനില്‍ ജനങ്ങള്‍ യുഡിഎഫിനെ ഭരണം എല്‍പ്പിച്ചിട്ടില്ലാത്ത സാഹചര്യത്തില്‍ ജനവിധി അട്ടിമറിക്കാന്‍ ശ്രമിക്കില്ലെന്ന് കോണ്‍ഗ്രസ് നേതാവ് കെ മുരളീധരന്‍.
‘തിരുവനന്തപുരം കോര്‍പറേഷനില്‍ ക്രിയാത്മകമായ പ്രതിപക്ഷമാകും. എന്നും ജനങ്ങള്‍ക്കൊപ്പമുണ്ടാകും. ജനങ്ങളുടെ പ്രശ്‌നങ്ങള്‍ എല്ലാം ഏറ്റെടുക്കുമെന്നും കെ മുരളീധരന്‍ പറഞ്ഞു.
തൃശൂരില്‍ യു.ഡി.എഫിന് അനുകൂലമായ സാഹചര്യം ഉണ്ടായത് സുരേഷ് ഗോപി എം.പി ആയതുകൊണ്ടാണ്. ആറ് മാസം കഴിയുമ്പോള്‍ ജനങ്ങള്‍ ബിജെപിയെ തിരിച്ചറിയും. എല്‍ഡിഎഫിന് ഏക ബദല്‍ യുഡിഎഫ് മാത്രമാണ്-കെ മുരളീധരന്‍ അവകാശപ്പെട്ടു.
തിരുവനന്തപുരം കോര്‍പ്പറേഷനില്‍ ആകെയുളള 101 വാര്‍ഡുകളില്‍ നൂറിലാണ് വോട്ടെടുപ്പ് നടത്തിയത്.വിഴിഞ്ഞത്തെ വോട്ടെടുപ്പ് സ്ഥാനാര്‍ത്ഥിയുടെ മരണം മൂലം മാറ്റി വച്ചു.50 സീറ്റില്‍ ബി ജെ പി വിജയിച്ചു.ബി ജെ പിയെ അധികാരത്തില്‍ നിന്നകറ്റി നിര്‍ത്താന്‍ ഇവിടെയും ഇന്‍ഡി മുന്നണി രൂപപ്പെടുമെന്ന അഭ്യൂഹം ഉണ്ടായിരുന്നെങ്കിലും നാല് മാസം അകലെ മാത്രമാണ് നിയമസഭാ തെരഞ്ഞെടുപ്പ് എന്നത് സി പി എമ്മിനെയും കോണ്‍ഗ്രസിനെയും ഒരുമിക്കുന്നതില്‍ നിന്ന് പിന്നോട്ടടിക്കുമെന്ന വാദമാണ് രാഷ്‌ട്രീയ നിരീക്ഷകര്‍ മുന്നോട്ട് വച്ചിരുന്നത്.
