കോഴിക്കോട്: കൊല്ലം വിജിലന്‍സ് കോടതിയില്‍ സര്‍ക്കാര്‍ എടുത്ത നിലപാട് സ്വര്‍ണക്കൊള്ളക്കേസില്‍ സത്യം പുറത്തുവരാതിരിക്കാനുള്ള സംസ്ഥാന സര്‍ക്കാറിന്റെ വ്യഗ്രതയാണ് കാണിക്കുന്നതെന്ന് ബിജെപി മുന്‍ സംസ്ഥാന അധ്യക്ഷന്‍ കെ. സുരേന്ദ്രന്‍ പറഞ്ഞു. കോഴിക്കോട് പ്രസ് ക്ലബ് സംഘടിപ്പിച്ച മീറ്റ് ദ ലീഡര്‍ പരിപാടിയില്‍ സംസാരിക്കുകയായിരുന്നു അദ്ദേഹം. കോടതിയില്‍ സര്‍ക്കാര്‍ അഭിഭാഷകര്‍ നല്‍കിയ സത്യവാങ്മൂലം സര്‍ക്കാരിന്റെ ആത്മാര്‍ത്ഥതയില്ലായ്‌മയുടെ തെളിവാണ്. എല്ലാ വിശദാംശങ്ങളും പുറത്തുവരണമെന്ന് നേരത്തെ പറഞ്ഞവര്‍ ഇ ഡി അന്വേഷണം അനുവദിക്കില്ലെന്നാണ് ഇപ്പോള്‍ വ്യക്തമാക്കുന്നത്. സിപിഎമ്മിന്റെ ഉന്നത നേതാക്കളായ വാസുവും പത്മകുമാറും പിടിയിലായതോടെ അന്വേഷണം അവസാനിച്ച മട്ടിലാണ്.
ഉണ്ണികൃഷ്ണന്‍ പോറ്റി മുതല്‍ പത്മകുമാര്‍ വരെയുള്ളവര്‍ പ്രത്യേക അന്വേഷണ സംഘത്തിന് നല്‍കിയ മൊഴികള്‍ സര്‍ക്കാരിനെതിരെയാണ്. ദേവസ്വം ബോര്‍ഡ് പ്രസിഡന്റിലേക്കും മന്ത്രിയിലേക്കും എത്തുന്നതാണത്. കടകംപള്ളി സുരേന്ദ്രന്റെ അനധികൃത ഇടപാടുകളെകുറിച്ചും മൊഴിയിലുണ്ട്. ഇതൊക്കെ ഇഡി അന്വേഷിച്ചാല്‍ പുറത്തുവരുമെന്ന ഭയം കൊണ്ടാണ് ഇ ഡി അന്വേഷണം പറ്റില്ലെന്ന് സര്‍ക്കാര്‍ നിലപാടെടുക്കുന്നത്. സത്യം പുറത്ത് വരാന്‍ മുഖ്യമന്ത്രിക്കോ സര്‍ക്കാറിനോ താത്പര്യമില്ല. ഇ ഡി അന്വേഷണം മുന്നോട്ട് പോയാല്‍ പ്രതികളുടെ അപ്പുറത്തേക്ക് അതെത്തുമെന്ന ഭയമാണ് സര്‍ക്കാറിനുള്ളത്. അന്വേഷണ സംഘത്തിന് വിലങ്ങ് വെച്ചിരിക്കുകയാണ്. അദ്ദേഹം പറഞ്ഞു.
ബണ്ടി ചോര്‍ മുതല്‍ ഗോവിന്ദച്ചാമി വരെയുള്ളവര്‍ക്ക് ലുക്ക്ഔട്ട് നോട്ടീസ് നല്‍കിയതുപോലെ കേരളത്തിലെ ഒരു യുഡിഎഫ് എംഎല്‍എയ്‌ക്കെതിരെയും ലുക്ക്ഔട്ട് നോട്ടീസ് പുറപ്പെടുവിക്കേണ്ടി വന്നിരിക്കുകയാണ്. പ്രിയങ്ക വാദ്രയ്‌ക്കും രാഹുല്‍ ഗാന്ധിക്കുമെതിരെ പരാതി നേരത്തെ ലഭിച്ചിരുന്നു. ദീപാദാസ് മുന്‍ഷിയുടെ മുന്നിലടക്കം പരാതി എത്തിയിരുന്നു. കോണ്‍ഗ്രസ് നേതൃത്വം എംഎല്‍എ യെ സംരക്ഷിക്കുകയായിരുന്നു. അദ്ദേഹം പറഞ്ഞു.
ഇരു മുന്നണികളും കേരളത്തില്‍ പ്രതിസന്ധിയിലാണെന്നും എല്‍ഡിഎഫിനെതിരെ കൂടുതല്‍ അഴിമതി ആരോപണങ്ങള്‍ ഉയര്‍ന്നുവരികയാണെന്നും യുഡിഎഫിന് നിവര്‍ന്നു നില്‍ക്കാന്‍ പറ്റാത്ത അവസ്ഥയാണെന്നും സുരേന്ദ്രന്‍ പറഞ്ഞു. രണ്ട് മുന്നണികളും മുഖം നഷ്ടപെട്ട അവസ്ഥയിലാണ്. എല്‍ഡിഎഫ് സര്‍ക്കാര്‍ പ്രതിരോധത്തിലാണെങ്കില്‍ പ്രതിപക്ഷം പ്രതിക്കൂട്ടിലാണ്.
ഇരുമുന്നണികളും തീവ്രവാദ ശക്തികളുമായി ചേര്‍ന്നാണ് തെരഞ്ഞെടുപ്പിനെ നേരിടുന്നത്. കോഴിക്കോട് കോര്‍പ്പറേഷനില്‍ കോണ്‍ഗ്രസ് പരസ്യമായി ജമാഅത്തെ ഇസ്ലാമിയയുമായി സഖ്യത്തിലാണ്. ജമാഅത്തെ ഇസ്ലാമിയുടെ സ്ഥാനാര്‍ത്ഥിത്വം ലീഗ് അധ്യക്ഷന്‍ സാദിഖലി ശിഹാബ് തങ്ങള്‍ പ്രഖ്യാപിച്ചതിലൂടെ സംസ്ഥാനത്തിന്റെ പൊതുതാത്പര്യത്തിനും മതേതരത്വത്തിനും ഭീഷണി ഉയര്‍ന്നിരിക്കുകയാണ്. മതേതര നിലപാടിന്റെ വക്താവാണെന്ന് അറിയപ്പെടുന്ന പാണക്കാട് തങ്ങളാണ് ഈ പ്രഖ്യാപനം നടത്തിയതെന്നത് ആശങ്ക ഉളവാക്കുന്നു അദ്ദേഹം പറഞ്ഞു. ബിജെപി സിറ്റി ജില്ലാ പ്രസിഡന്റ് അഡ്വ. കെ.പി. പ്രകാശ് ബാബു, പ്രസ് ക്ലബ് പ്രസിഡന്റ് ഇ.പി. മുഹമ്മദ്, സെക്രട്ടറി പി. സജിത്ത്, എ. ബിജുനാഥ് എന്നിവര്‍ പങ്കെടുത്തു.
