പാലക്കാട്: ക്രൂര പീഡനം നേരിട്ടിട്ടുളള അതിജീവിതകള്‍ക്ക് കിട്ടുന്ന നീതിയുടെ തുടക്കം മാത്രമാണ് രാഹുല്‍ മാങ്കൂട്ടത്തിലിന്റെ മുന്‍കൂര്‍ ജാമ്യാപേക്ഷ തള്ളിയ സംഭവത്തിലൂടെ ഉണ്ടായിട്ടുളളതെന്ന് നടി റിനി ആന്‍ ജോര്‍ജ്. ഇനിയും അതിജീവിതകളുണ്ടെന്നാണ് മനസിലാക്കുന്നത്.അവരും കേസിന്റെ ഭാഗമാകണമെന്ന് നടി പറഞ്ഞു.
പലര്‍ക്കും പല പ്രശ്നങ്ങളും ഉണ്ടായിട്ടുണ്ട്. പലരും പറയാന്‍ മടിക്കുന്ന കാര്യങ്ങളാണ് താന്‍ പറയുന്നത്. അതിജീവിതകള്‍ ട്രോമയുമായി വീട്ടിലിരിക്കരുത്. സ്ത്രീപക്ഷ നടപടി സ്വീകരിച്ചതിന് കോണ്‍ഗ്രസ് നേതൃത്വത്തിന് എല്ലാ അതിജീവിതമാരുടെ പേരിലും നന്ദി പറയുന്നുവെന്നും നടി റിനി ആന്‍ ജോര്‍ജ് പറഞ്ഞു. സത്യം തന്നെ ജയിക്കും.
ഒരുപാട് സൈബര്‍ ആക്രമണം നേരിടേണ്ടി വന്നിട്ടുണ്ടെന്ന് റിനി ആന്‍ ജോര്‍ജ് പറഞ്ഞു.കെട്ടിച്ചമച്ച കഥകളാണെന്നായിരുന്നു ആരോപണം.ഇപ്പോള്‍ കോടതി തന്നെ ആരോപണങ്ങളൊന്നും കെട്ടിച്ചമച്ചതല്ലെന്ന സൂചനകള്‍ നല്‍കി. അത്രയും വിഷമത്തോടുകൂടി പറഞ്ഞ കാര്യങ്ങള്‍ക്ക് ഒരുപാട് അനുഭവിച്ചു. എന്റെ സഹോദരിമാര്‍ക്ക് നീതി ലഭിക്കുന്നതിന് ഒരു നിമിത്തമായി എന്നതില്‍ അത്യന്തം ചാരിതാര്‍ത്ഥ്യമുണ്ടെന്നും റിനി ആന്‍ ജോര്‍ജ് പറഞ്ഞു.
