ലഖ്നൗ: സയ്യിദ് മുഷ്താഖ് അലി ട്വന്റി 20 ടൂര്ണ്ണമെന്റില് കേരളത്തിന് തോല്വി. റെയില്വേസ് 32 റണ്സിനാണ് കേരളത്തെ പരാജയപ്പെടുത്തിയത്. ആദ്യം ബാറ്റ് ചെയ്ത റെയില്വേസ് 20 ഓവറില് ഏഴ് വിക്കറ്റ് നഷ്ടത്തില് 149 റണ്സെടുത്തു. മറുപടി ബാറ്റിങ്ങിന് ഇറങ്ങിയ കേരളത്തിന് 20 ഓവറില് എട്ട് വിക്കറ്റ് നഷ്ടത്തില് 117 റണ്സ് മാത്രമാണ് നേടാനായത്.
ടോസ് നേടിയ കേരളം റെയില്വേസിനെ ആദ്യം ബാറ്റ് ചെയ്യാനയക്കുകയായിരുന്നു. മധ്യനിരയില് രവി സിങ്ങിന്റെ(25)യും നവനീത് വിര്ക്കിന്റെ(32)യും പ്രകടനമാണ് റെയില്വേസിന്റെ സ്കോര് 149ല് എത്തിച്ചത്. ഇരുവരുടേതുമുള്പ്പടെ മൂന്ന് വിക്കറ്റുകള് വീഴ്ത്തിയ കെ എം ആസിഫിന്റെ പ്രകടനമാണ് കേരള ബൗളിങ് നിരയില് ശ്രദ്ധേയമായത്. അഖില് സ്കറിയയും ഷറഫുദ്ദീനും രണ്ട് വിക്കറ്റുകള് വീതം വീഴ്ത്തി.
മറുപടി ബാറ്റിങ്ങിന് ഇറങ്ങിയ കേരളത്തിന് ഒരു ഘട്ടത്തിലും അവസരത്തിനൊത്ത് ഉയരാനായില്ല. ബാറ്റിങ് നിര ഒന്നാകെ തകര്ത്തടിഞ്ഞത് കേരളത്തിന് തിരിച്ചടിയായി.
19 റണ്സെടുത്ത ക്യാപ്റ്റന് സഞ്ജു സാംസണ് ടോപ് സ്കോറര് ആയി. ഇടയ്ക്ക് അഖില് സ്കറിയ(16)യും സല്മാന് നിസാറും(18) ചേര്ന്നുള്ള കൂട്ടുകെട്ട് കേരളത്തിന് പ്രതീക്ഷ നല്കി. മറ്റുള്ളവര് രണ്ടക്കം കാണാതെ മടങ്ങിയപ്പോള് അങ്കിത് ശര്മ്മ 15 റണ്സുമായി പുറത്താകാതെ നിന്നു. മൂന്ന് വിക്കറ്റ് വീഴ്ത്തിയ അടല് ബിഹാരി റായ് ആണ് റെയില്വേസ് ബൗളിങ് നിരയില് തിളങ്ങിയത്. ശിവം ചൗധരി രണ്ട് വിക്കറ്റ് വീഴ്ത്തി.
