കൊല്ലം: മന്ത്രി കെ.ബി.ഗണേഷ് കുമാറിനെ കായ് ഫലമുള്ള മരമെന്ന് പുകഴ്ത്തുകയും കോണ്ഗ്രസ് നേതാക്കളെ മച്ചി മരങ്ങളെന്ന് പരോക്ഷമായി വിശേഷിപ്പിക്കുകയും ചെയ്ത വെട്ടിക്കവല ഗ്രാമപഞ്ചായത്ത് പ്രസിഡന്റിനെ കോണ്ഗ്രസ് പുറത്താക്കി. വെട്ടിക്കവല ഗ്രാമപഞ്ചായത്ത് പ്രസിഡന്റ് തലച്ചിറ അബ്ദുള് അസീസിനെയാണ് പാര്ട്ടിയില്നിന്ന് പുറത്താക്കിയത്. തലച്ചിറയില് മന്ത്രിക്കൊപ്പം പങ്കെടുത്ത റോഡ് ഉദ്ഘാടനസമ്മേളനത്തില് വച്ച് ഗണേഷ് കുമാര് കായ് ഫലമുള്ള മരമാണെന്നും അദ്ദേഹത്തെ വീണ്ടും തെരഞ്ഞെടുക്കണമെന്നും അസീസ് പ്രസംഗത്തില് ആവശ്യപ്പെട്ടിരുന്നു. വോട്ട് ചോദിച്ചു വരുന്ന മച്ചി മരങ്ങളെ ജനങ്ങള് തിരിച്ചറിയണമെന്നും കോണ്ഗ്രസ് നേതാവായ അബ്ദുള് അസീസ് ആഹ്വാനം ചെയ്തിരുന്നു. ഇതാണ് കോണ്ഗ്രസിനെ പ്രതിരോധത്തിലാക്കിയത്. പത്തനാപുരം നിയോജക മണ്ഡലത്തില് ഉള്പ്പെട്ട പഞ്ചായത്താണ് വെട്ടിക്കവല.
