ന്യൂദൽഹി: നാളെ സംഭവിക്കാൻ പോകുന്നതെന്താണെന്ന് ആർക്കുമറിയില്ലെന്നും ട്രംപ് നാളെ ചെയ്യാൻ പോകുന്നതെന്തെന്ന് അദ്ദേഹത്തിനും അറിയില്ലെന്നും കരസേനാ മേധാവി ജനറൽ ഉപേന്ദ്ര ദ്വിവേദി പറഞ്ഞതായി ടൈംസ് ഓഫ് ഇന്ത്യ റിപ്പോർട്ടു ചെയ്യു. ജന്മനാടായ മധ്യപ്രദേശിലെ രേവയിൽ ശനിയാഴ്ച നടന്ന സമ്മേളനത്തിലും പിന്നീട് മാധ്യമപ്രവർത്തകരുടെ ചോദ്യങ്ങൾക്കുള്ള മറുപടിയിലും അദ്ദേഹം പറഞ്ഞത് ഏറെ സുപ്രധാനമായ കാര്യങ്ങളായിരുന്നു. ഓപ്പറേഷൻ സിന്ദൂരിനെക്കുറിച്ച് അദ്ദേഹം സംസാരിച്ചപ്പോൾ യുദ്ധത്തിന്റെ ഭാവിയെക്കുറിച്ച് പരാമർശിച്ചു.
ഭാരതത്തിനും പാകിസ്ഥാനും ഇടയിൽ സമാധാനത്തിന് മധ്യസ്ഥത വഹിക്കുമെന്ന യുഎസ് പ്രസിഡന്റ് ഡൊണാൾഡ് ട്രംപിന്റെ പ്രസ്താവനകളെയും സമീപകാല അവകാശവാദങ്ങളെയും ജനറഞൽ പരാമർശിച്ചു.
ടിആർഎസ് കോളേജിൽ നടന്ന ഒരു പരിപാടിയിൽ സംസാരിക്കവെ, ഉയർന്നുവരുന്ന ആഗോള വെല്ലുവിളികളുടെ അനിശ്ചിതത്വവും സങ്കീർണ്ണതയും ജനറൽ വിവരിച്ചു. ‘… ഭാവിയിലെ വെല്ലുവിളികൾ പലതാണ്. അവ അസ്ഥിരത, അനിശ്ചിതത്വം, സങ്കീർണ്ണത, അവ്യക്തത എന്നിവയുണ്ട്. ഭാവി എന്തായിരിക്കുമെന്ന് നിങ്ങൾക്കും എനിക്കും പൂർണ്ണമായും അറിയില്ല. ട്രംപ് ഇന്ന് എന്താണ് ചെയ്യുന്നത്? നാളെ അദ്ദേഹം എന്താണ് ചെയ്യാൻ പോകുന്നതെന്ന് ട്രംപിന് പോലും അറിയില്ലെന്ന് ഞാൻ കരുതുന്നു. വെല്ലുവിളികൾ വളരെ വേഗത്തിൽ വരുന്നു, നിങ്ങൾ ഒരു വെല്ലുവിളി മനസ്സിലാക്കാൻ ശ്രമിക്കുമ്പോഴേക്കും പുതിയൊരെണ്ണം ഉയർന്നുവരുന്നു. സുരക്ഷ നമ്മുടെ സൈന്യത്തെ വെല്ലുവിളിക്കുന്നു. അതിർത്തിയിലായാലും, ഭീകരവാദമായാലും, പ്രകൃതിദുരന്തങ്ങളായാലും, സൈബർ യുദ്ധമായാലും അത് വെല്ലുവിളികളാണ്. പുതിയ ചില കാര്യങ്ങൾ: ബഹിരാകാശ യുദ്ധം, ഉപഗ്രഹങ്ങൾ, രാസ, ജൈവ, റേഡിയോളജിക്കൽ, വിവര യുദ്ധം തുടങ്ങിയവയാണ്. കിംവദന്തികൾ പ്രചരിക്കുന്ന രീതികൾ. ഓപ്പറേഷൻ സിന്ദൂരിൽ കറാച്ചി ആക്രമിക്കപ്പെട്ടുവെന്ന് നിങ്ങൾ വാർത്തകൾ കേട്ടു. അത്തരം നിരവധി വാർത്തകൾ വന്നു. അത് എവിടെ നിന്ന് വന്നു, ആരാണ് അത് ചെയ്തത്?… ഈ വെല്ലുവിളികളെല്ലാം പരിഗണിക്കുമ്പോൾ നിങ്ങൾ കര, ആകാശം, വെള്ളം, മൂന്നിലും പ്രവർത്തിക്കണം…’
മാധ്യമപ്രവർത്തകരോട് സംസാരിച്ചപ്പോൾ ജനറൽ ദ്വിവേദി പറഞ്ഞു: അയൽരാജ്യത്തെ ഭീകരവാദികളുടെ അടിസ്ഥാന സൗകര്യങ്ങൾ മാത്രമേ ഭാരതം തകർത്തുള്ളു. ഏപ്രിൽ മാസത്തെ സംഭവത്തിന് മറുപടിയായി മെയ് 7 ന് ഭാരതം പാകിസ്ഥാൻ നിയന്ത്രിക്കുന്ന പ്രദേശങ്ങളിലെ ഭീകരപ്രവർത്തന അടിസ്ഥാന സൗകര്യങ്ങൾ ലക്ഷ്യമിട്ട് ഓപ്പറേഷൻ സിന്ദൂർ ആരംഭിച്ചു. സൈനിക നടപടികൾ അവസാനിപ്പിക്കാനുള്ള ധാരണയോടെ മെയ് 10 ന് അവസാനിച്ച നാല് ദിവസത്തെ തീവ്രമായ ഏറ്റുമുട്ടലുകൾക്ക് ഈ ആക്രമണങ്ങൾ കാരണമായി. ‘ഞങ്ങളുടെ തത്ത്വങ്ങളുടെയും സാങ്കേതികവിദ്യയുടെയും സംയോജിത ശക്തിയോടെ ഞങ്ങൾ പോരാടിയതിനാൽ ഓപ്പറേഷൻ സിന്ദൂർ വിജയിച്ചു. പാകിസ്ഥാനിലെ ഒരു നിരപരാധിയായ സാധാരണക്കാരനും കഷ്ടപ്പാടുണ്ടാവരുതെന്ന് ഞങ്ങൾ ഉറപ്പിച്ചു. ഞങ്ങൾ ഭീകരരേയും അവരുടെ തലവന്മാരെയും മാത്രമേ ലക്ഷ്യമിട്ടുള്ളൂ,’ കരസേനാ മേധാവി പറഞ്ഞു.
തന്റെ മാതൃവിദ്യാലയമായ രേവ സൈനിക് സ്‌കൂളിലെ വിദ്യാർത്ഥികളെ അഭിസംബോധന ചെയ്തുകൊണ്ട് അദ്ദേഹം പറഞ്ഞു. ‘ഭീകരരുടെ സാന്നിധ്യമുള്ള സ്ഥലങ്ങൾ ഞങ്ങൾ ആക്രമിച്ചു. നിരപരാധികളായ സാധാരണക്കാരെയോ പ്രതിരോധ സ്ഥാപനങ്ങളെയോ ഞങ്ങൾ ലക്ഷ്യമിട്ടില്ല. ഓപ്പറേഷൻ സിന്ദൂരിൽ ഞങ്ങൾ ലക്ഷ്യം നേടി, ഞങ്ങൾ അവരെപ്പോലെയല്ല എന്ന സന്ദേശം പാകിസ്ഥാന് അയച്ചു,’ അദ്ദേഹം പറഞ്ഞു.
