ആലപ്പുഴ: സാമൂഹ്യ സുരക്ഷാ പെന്ഷന് മറ്റുള്ളവര്ക്ക് 2000 രൂപയായി വര്ദ്ധിപ്പിക്കുമ്പോഴും ഭിന്നശേഷിക്കാര്ക്ക് നല്കേണ്ട കൂടുതല് തുക സര്ക്കാര് വെട്ടിക്കുറയ്ക്കുന്നു. 2016ലെ ഭിന്നശേഷി അവകാശ നിയമപ്രകാരം സമൂഹത്തിലെ മറ്റുള്ളവര്ക്ക് നല്കുന്നതിനേക്കാള് 25 ശതമാനം അധികം ഭിന്നശേഷിക്കാര്ക്ക് നല്കണമെന്ന് അനുശാസിക്കുന്നുണ്ടെങ്കിലും വര്ഷങ്ങളായി ഇത് ലംഘിക്കപ്പെടുന്നു.
ഇത് ഭിന്നശേഷിക്കാരോടുള്ള കടുത്ത നീതിനിഷേധമാണെന്നാണ് വിമര്ശനം. കേരളത്തില് പെന്ഷന് ഏകീകരിച്ച നാള് മുതല് ഭിന്നശേഷിക്കാര്ക്ക് പ്രത്യേക ആനുകൂല്യം നല്കാതെ മറ്റുള്ളവര്ക്ക് നല്കുന്ന തുക തന്നെയാണ് നല്കിവരുന്നത്. 2016ലെ ഭിന്നശേഷി അവകാശ നിയമത്തിന്റെ ലംഘനമാണ് സര്ക്കാര് നടത്തുന്നത്. മറ്റുള്ളവരെക്കാള് 25 ശതമാനം കൂടുതല് പെന്ഷന് ഭിന്നശേഷിക്കാര്ക്ക്, അവകാശമുണ്ടെന്നിരിക്കെ 25 ശതമാനം തുക കൂടി ചേര്ത്ത് ഭിന്നശേഷി പെന്ഷന് 2500 രൂപയായി വര്ദ്ധിപ്പിച്ച് നല്കണമെന്നാണ് ആവശ്യം.
മറ്റ് അയല്സംസ്ഥാനങ്ങളിലെല്ലാം പെന്ഷനില് 25 ശതമാനം അധികം തുക ഭിന്നശേഷിക്കാര്ക്ക് നല്കുമ്പോള് കേരളത്തില് അര്ഹതപ്പെട്ട തുക നല്കാത്തത് വരിയില് നില്ക്കാന് ആവാത്തവരോട് കാണിക്കുന്ന അനീതിയാണെന്നാണ് വിമര്ശനം. കേരളത്തില് പെന്ഷന് ഏകീകരണം ഉണ്ടാകുന്നതിനു മുമ്പ് ഭിന്നശേഷിക്കാര്ക്ക് 300 രൂപ അധികം ലഭിച്ചിരുന്നതും ഏകീകരണത്തോടെ നഷ്ടപ്പെടുകയുണ്ടായി. വാര്ഷിക വരുമാനം ഒരു ലക്ഷം രൂപയില് കൂടുതലായാല് കിടപ്പുരോഗികളായ ഭിന്നശേഷിക്കാര്ക്ക് പോലും പെന്ഷന് കിട്ടാത്ത സാഹചര്യവും പെന്ഷന് ഏകീകരണം കൊണ്ട് ഉണ്ടായ ദോഷമാണ്.
ഭിന്നശേഷിക്കാര്ക്ക് വാര്ഷിക വരുമാന പരിധി എന്ന നിബന്ധന ഒഴിവാക്കുകയും ഭിന്നശേഷിക്കാരെ ബിപിഎല് ആയി പരിഗണിക്കുകയും വേണം. ഈ വിഷയത്തില് അടിയന്തര നടപടി സ്വീകരിച്ച് നിലവില് വര്ധിപ്പിച്ചിരിക്കുന്ന സാമൂഹ്യ സുരക്ഷാ പെന്ഷന് തുകയായ 2000 രൂപയുടെ 25 ശതമാനായ 500 രൂപ കൂടി ചേര്ത്ത് 2500 രൂപ ദിവ്യാംഗര്ക്ക് പെന്ഷന് അനുവദിക്കണമെന്ന് ചൂണ്ടിക്കാട്ടി സാമൂഹ്യ പ്രവര്ത്തകനായ ചന്ദ്രദാസ് കേശവപിള്ള ഭിന്നശേഷി കമ്മീഷണര്ക്കും, സാമൂഹ്യനീതി വകുപ്പ് സെക്രട്ടറിക്കും കത്തയച്ചു.
