ഗുവാഹത്തി : അസം മുഖ്യമന്ത്രി ഹിമന്ത ബിശ്വ ശർമ്മയെ കർണാടക ഐടി മന്ത്രി പ്രിയങ്ക് ഖാർഗെ വിമർശിച്ചതിനെ തുടർന്ന് വാക്പോര് പൊട്ടിപ്പുറപ്പെട്ടു. അസമിലെ യുവാക്കളുടെ കഴിവിനെ ചോദ്യം ചെയ്ത കോൺഗ്രസ് നേതാവിനെ ഹിമന്ത ബിശ്വ ശർമ്മ “ഒന്നാം ക്ലാസ് വിഡ്ഢി” എന്ന് വിളിച്ചിരുന്നു. ഇപ്പോൾ കോൺഗ്രസ് നേതാവിനെതിരെ അസമിലെ ബിജെപി യൂണിറ്റ് “ഹലോ, ടെഡി ബോയ്” എന്ന് പരിഹസിച്ചുകൊണ്ട് വിമർശിച്ചു. സോഷ്യൽ മീഡിയയിൽ നീണ്ട ഉപന്യാസങ്ങൾ എഴുതുന്നത് അദ്ദേഹത്തെ ഒരു വിദഗ്‌ദ്ധനാക്കില്ലെന്ന് ബിജെപി പറഞ്ഞു.
“ഹലോ ടെഡി ബോയ്, എക്‌സിൽ നീണ്ട ഉപന്യാസങ്ങൾ എഴുതുന്നത് നിങ്ങളെ ഒരു ‘അർദ്ധചാലക വിദഗ്‌ദ്ധൻ’ ആക്കില്ല” – കോൺഗ്രസ് നേതാവിന്റെ ട്വീറ്റിന് മറുപടിയായി പാർട്ടി പറഞ്ഞു. കൂടാതെ “ആസാമിനെക്കുറിച്ച് പ്രഭാഷണങ്ങൾ നടത്തുന്നതിനുപകരം, നിങ്ങളുടെ സ്വന്തം പിൻമുറ്റം നന്നായി നോക്കുക , നിങ്ങളുടെ ജില്ല ഇപ്പോഴും ദക്ഷിണേന്ത്യയിലെ ദാരിദ്ര്യ പട്ടികയിൽ ഒന്നാമതാണ്. ” – ബിജെപി കൂട്ടിച്ചേർത്തു.
തന്റെ സംസ്ഥാനത്തിനായി ഉദ്ദേശിച്ചിരുന്ന സെമികണ്ടക്ടർ നിക്ഷേപങ്ങൾ കേന്ദ്ര സർക്കാർ ഗുജറാത്തിലേയ്‌ക്കും അസമിലേക്കുമായി തിരിച്ചുവിടുന്നുവെന്ന് കർണാടക മന്ത്രി തിങ്കളാഴ്ച ഒരു വാർത്താ ചാനലിൽ പറഞ്ഞതിനെ തുടർന്നാണ് തർക്കം പൊട്ടിപ്പുറപ്പെട്ടത്.
“സെമിക്കണ്ടക്ടർ വ്യവസായങ്ങൾ ബെംഗളൂരുവിലേക്ക് വരാൻ ആഗ്രഹിക്കുമ്പോൾ എന്തിനാണ് അസമിലേക്കും ഗുജറാത്തിലേയ്‌ക്കും പോകുന്നത്? കർണാടകയ്‌ക്കായി ഉദ്ദേശിച്ചിരുന്ന എല്ലാ നിക്ഷേപങ്ങളും കേന്ദ്ര സർക്കാർ കൈകൊണ്ട് വളച്ചൊടിക്കുന്നു,” – ഖാർഗെ അവകാശപ്പെട്ടു.
മറുപടിയായി ഹിമന്ത ശർമ്മ പ്രിയങ്കിനെ ഒന്നാം ക്ലാസ് വിഡ്ഢി എന്ന് വിളിക്കുകയും കോൺഗ്രസ് മന്ത്രിയുടെ പരാമർശങ്ങൾ അസമിലെ വിദ്യാസമ്പന്നരും യുവാക്കളുമായ വ്യക്തികളെ അപമാനിക്കുന്നതാണെന്ന് പറയുകയും ചെയ്തു. കൂടാതെ ഖാർഗെയ്‌ക്കെതിരെ കേസ് രജിസ്റ്റർ ചെയ്യുന്നതിനെക്കുറിച്ച് തന്റെ സർക്കാർ ആലോചിക്കുന്നുണ്ടെന്നും മന്ത്രിയുടെ ആക്ഷേപകരമായ പ്രസ്താവനയെ അപലപിക്കാത്തതിന് കോൺഗ്രസിനെ വിമർശിക്കുകയും ചെയ്തുവെന്നും മുഖ്യമന്ത്രി പറഞ്ഞു.
