ഇസ്ലാമബാദ്: ഒരു കാലത്ത് അടുത്ത സുഹൃത്തുക്കളായിരുന്ന പാകിസ്ഥാനും താലിബാനും ഇപ്പോള്‍ കീരിയും പാമ്പും ആയി മാറിയത് എന്തുകൊണ്ടാണ്? പാകിസ്ഥാനില്‍ ടിടിപി (തെഹ്രീക് ഇ താലിബാന്‍ പാകിസ്ഥാന്‍ ) എന്ന ഭീകരസംഘടന പാകിസ്ഥാനില്‍ തുടര്‍ച്ചയായി വലിയ സ്ഫോടനങ്ങളും കലാപങ്ങളും അഴിച്ചുവിടാന്‍ തുടങ്ങിയതോടെയാണ് പാകിസ്ഥാന്‍ താലിബാന്‍ സര്‍ക്കാരിനെതിരെ തിരിഞ്ഞത്.
പാകിസ്ഥാന്‍ സൈന്യത്തിന്റെയും സര്‍ക്കാരിന്റെയും ഉറക്കം കെടുത്തുന്ന ക്രൂരമായ ആക്രമണങ്ങള്‍ ടിടിപി അഴിച്ചുവിടുന്നതിന് പിന്നില്‍ പ്രവര്‍ത്തിക്കുന്നത് താലിബാന്‍ ആണെന്ന് പാകിസഥാന്‍ കുറ്റപ്പെടുത്തിയിരുന്നു. പഷ്തൂണ്‍ ദേശീയത ഉയര്‍ത്തിപ്പിടിക്കുന്ന ഭീകരസംഘടനയാണ് ടിടിപി. ദിയോബന്ദി ജിഹാദിസ്റ്റുകളാണ് ടിടിപിക്കാര്‍. നൂര്‍ വാലി മെഹ്സൂദ് ആണ് ഇപ്പോഴത്തെ നേതാവ്. ചാവേര്‍ ആക്രമണമാണ് ടിടിപിയുടെ രീതി. ഒരു ഷിയ വിരുദ്ധ ഭീകരഗ്രൂപ്പാണിത്. പാക് സൈന്യത്തിനെതിരെ യുദ്ധം ചെയ്ത് പാകിസ്ഥാന്‍ സര്‍ക്കാരിനെ താഴെയിറക്കുക എന്നതാണ് ടിടിപിയുടെ ലക്ഷ്യം.
ടിടിപിയെ പ്രതിരോധത്തിലാക്കാന്‍ ഖൈബര്‍ പക്തൂണ്‍ക്വാ പ്രദേശത്ത് പാക് സൈന്യം കടുത്ത വ്യോമാക്രമണം നടത്തിയിരുന്നു. ഇതോടെ ടിടിപി ഭീകരര്‍ കൂട്ടത്തോടെ അഫ്ഗാനിസ്ഥാനിലേക്ക് വലിഞ്ഞു എന്നതാണ് പാക് സൈന്യത്തിന്റെ കണക്കുകൂട്ടല്‍. ഇതോടെയാണ് ഇവരെ നശിപ്പിക്കാന്‍ കാബൂളിലും ബോംബാക്രമണം നടത്തിയത്.
അഫ്ഗാനിസ്ഥാനില്‍ പരിശീലനം നല്‍കിയ ശേഷം ടിടിപി ഭീകരരെ പാകിസ്ഥാനുള്ളില്‍ കലാപം നടത്താന്‍ താലിബാന്‍ അയയ്‌ക്കുകയാണെന്നും ഇത് ഉടന്‍ നിര്‍ത്തണമെന്നും ഒടുവില്‍ പാകിസ്ഥാന്‍ താക്കീത് നല്‍കി. എന്നാല്‍ ഇത് നിഷേധിച്ച താലിബാന്‍ തിരികെ പാകിസ്ഥാന്‍ അഫ്ഗാനിസ്ഥാനെ അസ്ഥിരപ്പെടുത്താന്‍ ശ്രമിക്കുകയാണെന്ന് ആരോപിക്കുകയായിരുന്നു.
പാകിസ്ഥാന്‍ സൈന്യം താലിബാന്‍ സര്‍ക്കാരിനെതിരെ വ്യാജവാര്‍ത്ത പരത്തുകയാണെന്നാണ് താലിബാന്‍ ആരോപിക്കുന്നത്. മാത്രമല്ല, അഫ്ഗാന്‍ അതിര്‍ത്തികളില്‍ നടക്കുന്ന പല ഭീകരാക്രമണങ്ങള്‍ക്ക് പിന്നിലും പാകിസ്ഥാനാണെന്നും താലിബാന്‍ കരുതുന്നു. പാകിസ്ഥാന്‍ ഇസ്ലാമിക് സ്റ്റേറ്റ് ഭീകരര്‍ക്ക് അഭയം നല്‍കുന്നുണ്ടെന്നും താലിബാന്‍ ആരോപിക്കുന്നു. ഇസ്ലാമിക് സ്റ്റേറ്റിനെ പ്രധാന ശത്രുവായി താലിബാന്‍ കാണുന്നു. ഇസ്ലാമിക് സ്റ്റേറ്റ്-ഖൊറാസന്‍ വിഭാഗവുമായി താലിബാന്‍ നിരന്തരം അഫ്ഗാനിസ്ഥാനകത്ത് യുദ്ധം നടന്നിരുന്നു. ഇവരെ പാകിസ്ഥാനാണ് പരിശീലിപ്പിക്കുന്നതെന്നാണ് താലിബാന്റെ ആരോപണം.
