ന്യൂദല്‍ഹി: മംഗോളിയന്‍ പൗരന്മാര്‍ക്ക് സൗജന്യ ഇ – വിസകള്‍ പ്രഖ്യാപിച്ച് പ്രധാനമന്ത്രി നരേന്ദ്ര മോദി. മംഗോളിയന്‍ പ്രസിഡന്റ് ഖുറെല്‍സുഖ് ഉഖ്നയുമായുള്ള കൂടിക്കാഴ്ചയ്‌ക്കു ശേഷമാണ് പ്രധാനമന്ത്രി സൗജന്യ ഇ- വിസകള്‍ പ്രഖ്യാപിച്ചത്.
ലഡാക്ക് ഓട്ടോണമസ് ഹില്‍ ഡെവലപ്മെന്റ് കൗണ്‍സിലും മംഗോളിയയിലെ അര്‍ഖന്‍ഗായ് പ്രവിശ്യയും തമ്മില്‍ ഒപ്പുവച്ച ധാരണാപത്രം ഇരുരാജ്യങ്ങളും തമ്മിലുള്ള സാംസ്‌കാരിക ബന്ധത്തിന് പുതിയ ഉത്തേജനം നല്‍കുമെന്ന് പ്രധാനമന്ത്രി പറഞ്ഞു. ഇന്നലെ ന്യൂദല്‍ഹിയിലെ ഹൈദരാബാദ് ഹൗസിലായിരുന്നു കൂടിക്കാഴ്ച. ഇരുരാജ്യങ്ങളും തമ്മിലുള്ള സൗഹൃദവും സഹകരണവും കൂടുതല്‍ ശക്തമാക്കുന്നതിനെക്കുറിച്ചും ചര്‍ച്ചയായി. ഇരുവരും ചേര്‍ന്ന് ഹൈദരാബാദ് ഹൗസ് പരിസരത്ത് വൃക്ഷത്തൈ നട്ടു.
ഇരുരാജ്യങ്ങളും തമ്മില്‍ നയതന്ത്ര ബന്ധം സ്ഥാപിച്ചതിന്റെ 70-ാം വാര്‍ഷികാഘോഷങ്ങളുടെ ഭാഗമായി പ്രധാനമന്ത്രി നരേന്ദ്ര മോദിയും മംഗോളിയന്‍ പ്രസിഡന്റ് ഖുറെല്‍സുഖ് ഉഖ്നയും ചേര്‍ന്ന് പ്രത്യേക സ്മാരക സ്റ്റാമ്പ് പുറത്തിറക്കി.
ഇരുരാജ്യങ്ങളുടെയും സമ്പന്നമായ നാടോടി നൃത്തപാരമ്പര്യങ്ങള്‍ എടുത്തുകാട്ടുന്നതാണ് സ്റ്റാമ്പ്. പരമ്പരാഗത ഭാരതീയ നാടോടി നാടകരൂപമായ രാംലീലയും മംഗോളിയന്‍ നാടോടി നൃത്തമായ ബിയേല്‍ജിയും സ്റ്റാമ്പില്‍ ഉള്‍പ്പെടുത്തിയിട്ടുണ്ട്.
ഭാരതവും മംഗോളിയയും തമ്മില്‍ ആഴത്തിലുള്ള സാംസ്‌കാരിക ബന്ധങ്ങളുടെയും പങ്കിട്ട പൈതൃകത്തിന്റെയും പ്രതീകാത്മക പ്രകടനമാണ് സംയുക്ത സ്റ്റാമ്പ് പ്രകാശനം.
