രാഹുലിന് വീണ്ടും കുരുക്ക് : രാജീവ് ഗാന്ധി ഫൗണ്ടേഷന് വിദേശത്ത് നിന്ന് പണം വരുന്ന സോഴ്സ് വെളിപ്പെടുത്തണം : നോട്ടീസ് നൽകി പോലീസ്

ന്യൂഡൽഹി : രാജീവ് ഗാന്ധി ഫൗണ്ടേഷനിൽ നിന്ന് നിർണ്ണായക വിവരങ്ങൾ ആവശ്യപ്പെട്ട് ഔദ്യോഗിക നോട്ടീസ് നൽകി ഒഡീഷയിലെ ജാർസുഗുഡ പോലീസ് . ഇന്ത്യാ വിരുദ്ധ പരാമർശങ്ങൾ നടത്തിയെന്നാരോപിച്ച് ഈ വർഷം ആദ്യം കോൺഗ്രസ് എംപി രാഹുൽ ഗാന്ധിക്കെതിരെ രജിസ്റ്റർ ചെയ്ത എഫ്‌ഐആറുമായി ബന്ധപ്പെട്ടാണ് നോട്ടീസ് അയച്ചിരിക്കുന്നത്.

സെപ്റ്റംബർ 3 ന് പുറപ്പെടുവിച്ച നോട്ടീസിൽ, വിദേശ സംഭാവനകൾ, ബാങ്ക് അക്കൗണ്ടുകൾ, ഓഡിറ്റർമാർ, വിവാദ സ്രോതസ്സുകളിൽ നിന്ന് ലഭിച്ചതായി ആരോപിക്കപ്പെടുന്ന സംഭാവനകൾ എന്നിവയുമായി ബന്ധപ്പെട്ട വിശദമായ രേഖകൾ സമർപ്പിക്കാൻ ഫൗണ്ടേഷനോട് നിർദ്ദേശിക്കുന്നുണ്ട്.

ഉത്തരവ് പ്രകാരം, രേഖകൾ 2025 നവംബർ 4 ന് മുമ്പ് ജാർസുഗുഡയിലെ സബ് ഡിവിഷണൽ പോലീസ് ഓഫീസറുടെ (എസ്ഡിപിഒ) മുമ്പാകെ നേരിട്ട് ഹാജരാക്കണം. കേസിൽ ഇതിനകം പട്ടികപ്പെടുത്തിയിരിക്കുന്ന കുറ്റങ്ങൾക്ക് പുറമേ, ഭാരതീയ ന്യായ സംഹിത (ബിഎൻഎസ്) സെക്ഷൻ 210 പ്രകാരം നിയമനടപടിക്ക് കാരണമാകുമെന്നും നോട്ടീസിൽ വ്യക്തമാക്കുന്നു.

രാഹുൽ ഗാന്ധി രാജീവ് ഗാന്ധി ഫൗണ്ടേഷന്റെ ബോർഡ് അംഗങ്ങളിൽ ഒരാളാണ്. സോണിയ ഗാന്ധി, പ്രിയങ്ക ഗാന്ധി വാദ്ര, പി. ചിദംബരം, സുമൻ ദുബെ, അശോക് ഗാംഗുലി, മൊണ്ടേക് സിംഗ് അലുവാലിയ, വിജയ് മഹാജൻ എന്നിവരാണ് മറ്റ് അംഗങ്ങൾ. വിവാദമതപ്രഭാഷകൻ സാക്കിർ നായിക്കിൽ നിന്നുള്ള സംഭാവനകളെക്കുറിച്ചുള്ള ആരോപണങ്ങളും നോട്ടീസിൽ പരാമർശിക്കുന്നു.

രാജീവ് ഗാന്ധി ഫൗണ്ടേഷന്റെ ധനകാര്യ ഡയറക്ടർ സന്ദീപ് ആനന്ദിനെ അഭിസംബോധന ചെയ്തുകൊണ്ടാണ് നോട്ടീസ്. 1991 ജൂണിൽ സ്ഥാപിതമായതുമുതൽ ഫൗണ്ടേഷന് ലഭിച്ച എല്ലാ വിദേശ സംഭാവനകളുടെയും വർഷം തിരിച്ചുള്ള രേഖകൾ , പണം നിക്ഷേപിച്ച ബാങ്ക് അക്കൗണ്ടുകളെക്കുറിച്ചുള്ള വിവരങ്ങൾ എന്നിവയും നോട്ടീസിൽ ആവശ്യപ്പെടുന്നു. ഈ അക്കൗണ്ടുകളിൽ ഒപ്പിട്ട അംഗീകൃത വ്യക്തികളുടെ വ്യക്തിഗത വിവരങ്ങളും സംഘടനയുടെ ഓഡിറ്റർമാരുടെ കോൺടാക്റ്റ് വിവരങ്ങളും ആവശ്യപ്പെട്ടിട്ടുണ്ട് . ഫോറിൻ കോൺട്രിബ്യൂഷൻ റെഗുലേഷൻ ആക്ട് (എഫ്‌സി‌ആർ‌എ) പ്രകാരം ഫൗണ്ടേഷന്റെ ലൈസൻസുകളുടെ പകർപ്പുകൾ പോലീസ് പ്രത്യേകം ആവശ്യപ്പെട്ടിട്ടുണ്ട്.

2011-ൽ രാജീവ് ഗാന്ധി ഫൗണ്ടേഷന് വിവാദ ഇസ്ലാമിക പ്രഭാഷകൻ സാക്കിർ നായിക്കിൽ നിന്ന് 300,000 ഡോളർ സംഭാവന ലഭിച്ചുവെന്നാണ് സൂചന . ആരോപണങ്ങളും നോട്ടീസിൽ പരാമർശിക്കുന്നു.യുപിഎ സർക്കാരിന്റെ കാലത്ത് പ്രധാനമന്ത്രിയുടെ ദുരിതാശ്വാസ നിധിയിൽ നിന്നും ധനകാര്യ മന്ത്രാലയത്തിൽ നിന്നുമുള്ള ഫണ്ട് ഫൗണ്ടേഷനിലേക്ക് വഴിതിരിച്ചുവിട്ടുവെന്ന ആരോപണവും ഇത് ഉയർത്തുന്നു. ഈ സംഭാവനകളുടെ ഉദ്ദേശ്യവും വിനിയോഗവും സംബന്ധിച്ച് പോലീസ് വിശദീകരണം ആവശ്യപ്പെട്ടിട്ടുണ്ട്.

2025 ജനുവരിയിൽ രാഹുൽ ഗാന്ധിക്കെതിരെ സമർപ്പിച്ച കേസുമായി ബന്ധപ്പെട്ടാണ് ഈ നോട്ടീസ്. ഇന്ത്യയുടെ ഐക്യത്തിനും അഖണ്ഡതയ്‌ക്കും ഭീഷണിയായ പ്രസ്താവനകൾ നടത്തിയെന്ന് ആരോപിച്ച് ഹിന്ദു സംഘടനകളും ബിജെപി നേതാക്കളും ജാർസുഗുഡ പോലീസിൽ പരാതി നൽകിയിരുന്നു.

റാം ഹരി പൂജാരി എന്ന വ്യക്തി സമർപ്പിച്ച എഫ്ഐആറിൽ, രാഹുലിന്റെ പരാമർശങ്ങൾ രാജ്യത്തിന്റെ ഐക്യത്തിനും അഖണ്ഡതയ്‌ക്കും ഭീഷണിയാണെന്ന് പറയുന്നു. ഇന്ത്യയ്‌ക്കെതിരെ യുദ്ധം പ്രഖ്യാപിച്ചുകൊണ്ട് അദ്ദേഹം രാജ്യത്തിനെതിരെ കലാപത്തിന് പ്രേരിപ്പിച്ചുവെന്നും അതിൽ പറയുന്നു.2025 ജനുവരി 15-ന് ഡൽഹിയിലെ കോട്‌ല റോഡിൽ പുതിയ കോൺഗ്രസ് ആസ്ഥാനം ഉദ്ഘാടനം ചെയ്തുകൊണ്ട് രാഹുൽ ഗാന്ധി നടത്തിയ പ്രസംഗമാണ് വിവാദത്തിന് കാരണമായത്.

പ്രാഥമിക അന്വേഷണത്തിന് ശേഷം, ഇൻസ്പെക്ടർ ജനറൽ ഓഫ് പോലീസ് (ഐജി) സാംബൽപൂർ റേഞ്ച്, ഹിമാൻഷു ലാൽ, ആരോപണങ്ങൾ പ്രഥമദൃഷ്ട്യാ ശരിയാണെന്ന് കണ്ടെത്തി, എഫ്ഐആർ രജിസ്റ്റർ ചെയ്യാൻ നിർദ്ദേശിച്ചു. ബിഎൻഎസിന്റെ 152, 197(1)(d) വകുപ്പുകൾ പ്രകാരം ജാർസുഗുഡ ടൗൺ പോലീസ് സ്റ്റേഷനിൽ കേസ് രജിസ്റ്റർ ചെയ്തു. ‘ ബിജെപിയും ആർ‌എസ്‌എസും നമ്മുടെ രാജ്യത്തെ ഓരോ സ്ഥാപനത്തെയും പിടിച്ചെടുത്തു. നമ്മൾ ഇപ്പോൾ പോരാടുന്നത് ബിജെപിയുമായും ആർ‌എസ്‌എസുമായും ഇന്ത്യൻ ഭരണകൂടവുമായുമാണ് ‘ എന്നായിരുന്നു രാഹുലിന്റെ പ്രസ്താവന.