ന്യൂദല്‍ഹി: തദ്ദേശീയമായി വികസിപ്പിക്കുന്ന അഞ്ചാം തലമുറ യുദ്ധ വിമാനങ്ങളുടെ എന്‍ജിനും ഭാരതത്തില്‍ത്തന്നെ നിര്‍മിക്കുന്നു. ഫ്രഞ്ച് കമ്പനിയായ സഫ്രാനുമായി ചേര്‍ന്നാണ് ഭാരതം യുദ്ധ വിമാന എന്‍ജിനുകള്‍ നിര്‍മിക്കാന്‍ ഒരുങ്ങുന്നതെന്ന് പ്രതിരോധ മന്ത്രി രാജ്‌നാഥ് സിങ് അറിയിച്ചു. ദല്‍ഹിയില്‍ നടന്ന വേള്‍ഡ് ലീഡേഴ്‌സ് യോഗത്തില്‍ പങ്കെടുത്ത് സംസാരിക്കുകയായിരുന്നു അദ്ദേഹം.
സ്റ്റെല്‍ത്ത് യുദ്ധവിമാനമായ അഡ്വാന്‍സ്ഡ് മീഡിയം കോംപാറ്റ് എയര്‍ക്രാഫ്റ്റ് എന്‍ജിനുകളാണ് അദ്യഘട്ടത്തില്‍ നിര്‍മിക്കുന്നത്. ഇതിനായുള്ള നടപടികള്‍ സ്വീകരിച്ചു വരികയാണ്. ഡിആര്‍ഡിഒയാണ് എന്‍ജിന്‍ നിര്‍മാണത്തിന്റെ ഏകോപനം. ബെംഗളൂരു ആസ്ഥാനമായുള്ള എയ്റോനോട്ടിക്കല്‍ ഡെവലപ്‌മെന്റ് ഏജന്‍സിയും(എഡിഎ) ഇതില്‍ പങ്കാളിയാകുമെന്നും രാജ്‌നാഥ് സിങ് പറഞ്ഞു.
എന്‍ജിന്‍ നിര്‍മാണത്തിന്റെ പേപ്പര്‍ ഡിസൈന്‍ എഡിഎ പൂര്‍ത്തിയാക്കി കഴിഞ്ഞു. അഞ്ച് പ്രോട്ടോടൈപ്പുകളാണ് ആദ്യം തയാറാക്കുക. 2027-ല്‍ ഇതിന്റെ റോള്‍ഔട്ട് ആസൂത്രണം ചെയ്തിട്ടുണ്ട്. 2028-ല്‍ ഫ്‌ളൈറ്റ് ടെസ്റ്റിങ്ങും പൂര്‍ത്തിയാക്കി 2036ല്‍ ഇന്‍ഡക്ഷന്‍ ചെയ്യാന്‍ സാധിക്കുമെന്നാണ് പ്രതീക്ഷിക്കുന്നത്. എന്‍ജിന്റെ അഞ്ച് പ്രോട്ടോടൈപ്പുകള്‍ രൂപകല്‍പന ചെയ്യുന്നതിനും വികസിപ്പിക്കുന്നതിനും മറ്റുമായി കേന്ദ്രം ഒരു വര്‍ഷം മുമ്പ് 15,000 കോടി രൂപ അനുവദിച്ചിട്ടുണ്ട്.
