തിരുവനന്തപുരം: തിരുവനന്തപുരം മ്യൂസിയത്തിലെ അനധികൃത നിയമനത്തിന്റെ വാര്ത്തകള് ഞെട്ടിപ്പിക്കുന്നതാണെന്നും ഇടതുവലത് അവിശുദ്ധ സഖ്യം സര്ക്കാര് ജോലി വീതം വെച്ച് എടുത്ത് യുവജനതയെ വഞ്ചിക്കുകയാണെന്നും യുവമോര്ച്ച സംസ്ഥാന പ്രസിഡന്റ് വി. മനുപ്രസാദ്.
ലക്ഷക്കണക്കിന് ചെറുപ്പക്കാര് ജോലി തേടി അലയുമ്പോഴാണ് വ്യാജ രേഖ ചമച്ചും ഇല്ലാത്ത തസ്തിക സൃഷ്ടിച്ചും സര്ക്കാര് ജോലിയിലേക്ക് ആളുകള് കടന്നുകൂടുന്നത്.
12 പേര് ഇത്തരത്തില് കടന്നുകൂടിയെന്നാണ് പുറത്തുവന്ന വിവരം. അതിലേറെ അത്ഭുതം യൂത്ത് കോണ്ഗ്രസ് സംസ്ഥാന അധ്യക്ഷനും എംഎല്എയും ആയ രാഹുല് മാങ്കൂട്ടത്തിന്റെ പി.എ അടക്കം അര്ഹതയില്ലാത്ത തസ്തികളില് തുടരുന്നു എന്നാണ് പുറത്തുവരുന്ന വാര്ത്തകള്. ഇതാണ് ബിജെപിയും യുവമോര്ച്ചയും പറഞ്ഞുകൊണ്ടിരിക്കുന്ന അഡ്ജസ്റ്റ്മെന്റ് രാഷ്ട്രീയം. സിപിഎം ഭരണത്തില് കോണ്ഗ്രസ് യുവ നേതാവിന്റെ പേഴ്സണല് സ്റ്റാഫിനും എന്ജിഒ യൂണിയന് നേതാവിനും ഒക്കെ സര്ക്കാര് ജോലിയില് അനധികൃതമായി നിയമനം ലഭിക്കുന്നു. അതും ഇല്ലാത്ത തസ്തികയില് വ്യാജ രേഖകള് ചമച്ച്. ഇത് കേരളത്തിലെ മുഴുവന് യുവാക്കളെയും ഇടത് വലത് മുന്നണികള് വഞ്ചിക്കുന്നതിന്റെ തെളിവാണ്.
സെക്രട്ടറിയേറ്റിനു മുന്പിലും തെരുവുകളിലും പി എസ് സി പരീക്ഷയെഴുതി യോഗ്യത നേടിയിട്ട് ജോലിക്കായി സമരം ചെയ്യുന്ന യുവാക്കളെ കണ്ടില്ലെന്നു നടിക്കുന്ന എല്ഡിഎഫ് സര്ക്കാരാണ് സ്വന്തക്കാരും കോണ്ഗ്രസ് നേതാവിന് വേണ്ടപ്പെട്ടവര്ക്കും അനധികൃത നിയമനം നല്കുന്നത്. ഇക്കാര്യത്തില് മാത്രമല്ല കേരളത്തിലെ സകല അഴിമതികളിലും കോണ്ഗ്രസിനും സിപിഎമ്മിനും പരസ്പര ധാരണയുണ്ട്. ആ മഞ്ഞുമലയുടെ ഒരറ്റം മാത്രമാണ് ഈ നിയമനത്തിലൂടെ പുറത്തുവരുന്നത്.
കേരളത്തിലെ യുവാക്കളെ വഞ്ചിക്കുന്ന ഇടത് സര്ക്കാരിനെതിരെയും അതിന് കൂട്ടുനിന്ന ലാഭം കൈപ്പറ്റുന്ന യുഡിഎഫിനെതിരെയും ശക്തമായ സമരപ്രക്ഷോഭങ്ങള്ക്കാണ് യുവമോര്ച്ച രൂപം നല്കാന് പോകുന്നത്. സര്ക്കാരിന് നേതൃത്വം നല്കുന്ന മുന്നണിയിലെ രണ്ടാമത്തെ പ്രധാന കക്ഷി ഭരിക്കുന്ന വകുപ്പിലാണ് ഇത്തരത്തിലുള്ള അനധികൃത നിയമനം നടന്നിരിക്കുന്നത്. ഈ വിഷയത്തില് ഡിവൈഎഫ്ഐയുടെയും എ.ഐ. വൈ എഫിന്റെയും നിലപാട് എന്താണെന്ന് വ്യക്തമാക്കണമെന്നും യുവമോര്ച്ച സംസ്ഥാനപ്രസിഡന്റ് വി.മനുപ്രസാദ് ആവശ്യപ്പെട്ടു.
