പാലക്കാട് :തനിക്കെതിരെ നില്‍ക്കുന്നത് ആരായാലും അവരെ ഇല്ലാതാക്കുമെന്ന് നെന്മാറ ഇരട്ടക്കൊലക്കേസ് പ്രതി ചെന്താമര.തനിക്കെതിരെ മൊഴി നല്‍കിയിട്ടുണ്ടെങ്കില്‍ ഭാര്യയുടെ ജീവിതവും തുലയ്‌ക്കുമെന്ന് ചെന്താമര വെളിപ്പെടുത്തി.
നെന്മാറ കേസിലെ വിചാരണ നടപടികള്‍ തുടങ്ങിയതിനെ തുടര്‍ന്ന് കോടതിയിലേക്ക് കൊണ്ടുപോകുമ്പോഴാണ് പൊലീസ് സാന്നിധ്യത്തില്‍ ചെന്താമരയുടെ മാധ്യമങ്ങളോടുളള പ്രതികരണം. ചെന്താമരയ്‌ക്കെതിരെ ഭാര്യ വ്യാഴാഴ്ച പാലക്കാട് കോടതിയില്‍ മൊഴി നല്‍കി. ഈ സാഹചര്യത്തിലാണ് ചെന്താമരയുടെ ഭീഷണി.
പോത്തുണ്ടി സ്വദേശികളായ സുധാകരന്‍, അമ്മ ലക്ഷ്മി എന്നിവരെ വീടിനുമുന്നിലിട്ടാണ് ചെന്താമര വെട്ടിക്കൊന്നത്.സുധാകരനെ ആക്രമിക്കുന്ന ശബ്ദംകേട്ട് ഓടിവന്ന ലക്ഷ്മിയെയും വെട്ടുകയായിരുന്നു. സുധാകരന്‍ സംഭവസ്ഥലത്തും ലക്ഷ്മി സ്വകാര്യ ആശുപത്രിയിലുമാണ് മരിച്ചത്.
സുധാകരന്റെ ഭാര്യ സജിതയെ 2019 ല്‍ ചെന്താമര കഴുത്തറുത്ത് കൊന്നിരുന്നു. ചെന്താമരയുടെ ഭാര്യയും മക്കളും ഇയാളുമായി അകന്നാണ് കഴിയുന്നത്. തന്റെ കുടുംബം തകര്‍ത്തത് സജിതയും സുധാകരനും ലക്ഷ്മിയുമാണെന്ന് ആരോപിച്ചാണ് സജിതയെ കൊലപ്പെടുത്തിയത്.
