ന്യൂദല്‍ഹി: അടുത്ത 12 മാസത്തിനുള്ളില്‍ നരേന്ദ്രമോദി സര്‍ക്കാരിനെ വീഴ്‌ത്താന്‍ ട്രംപ് ഉള്‍പ്പെട്ട ഡീപ്സ്റ്റേറ്റ് ശക്തികള്‍ അമേരിക്കന്‍ ചാരസംഘടനയായ സിഐഎ ഏല്‍പിച്ചിരിക്കുന്നതായി ജേണലിസ്റ്റിന്റെ വെളിപ്പെടുത്തല്‍. ഗോവയിലെ ബിജെപി നേതാവും ഗോവ ക്രോണിക്കിള്‍ എന്ന പത്രത്തിന്റെ സ്ഥാപകനുമായ സാവിയോ റൊഡ്രീഗ്സിന്റെതാണ് ഈ വെളിപ്പെടുത്തല്‍. ഇതിനെതിരെ ബിജെപി, ആര്‍എസ് എസ് പ്രവര്‍ത്തകരും നേതാക്കളും ജാഗ്രതയോടെ ഇരിയ്‌ക്കണമെന്നും നിര്‍ദേശിക്കപ്പെടുന്നു.
ട്രംപ് ഉള്‍പ്പെടെയുള്ള ഡീപ് സ്റ്റേറ്റാണ് സിഐഎയെ ഈ ജോലി ഏല്‍പിച്ചിരിക്കുന്നതെന്ന് പറയുന്നു. ട്രംപുമായി ചേര്‍ന്ന് നില്‍ക്കുന്ന അമേരിക്കന്‍ ബിസിനസ് സ്ഥാപനങ്ങളുടെ കൂട്ടായ്‌മയാണ് ഈ ഡീപ് സ്റ്റേറ്റ് ശക്തികള്‍. ഇതിനായി ബിജെപിയ്‌ക്കുള്ളില്‍ വിള്ളലുകള്‍ ഉണ്ടാക്കുക, ബിജെപിയും ആര്‍എസ്എസും തമ്മില്‍ ആശയക്കുഴപ്പമുണ്ടാക്കുക തുടങ്ങിയ ഗൂഢപദ്ധതികള്‍ സിഐഎ ആസൂത്രണം ചെയ്യുന്നതായും പറയപ്പെടുന്നു.
രാഹുല്‍ ഗാന്ധിയുള്‍പ്പെടെയുള്ള പ്രതിപക്ഷ പാര്‍ട്ടികള്‍ കൂടുതല്‍ സമരങ്ങളിലേക്കും അറസ്റ്റ് വരിക്കലിലേക്കും നീങ്ങുന്നതും ഈ ഡീപ് സ്റ്റേറ്റ് ഗൂഢാലോചനയുടെ ഭാഗമാണെന്ന് അറിയുന്നു. പ്രതിപക്ഷപാര്‍ട്ടികളുടെ പ്രവര്‍ത്തനങ്ങളില്‍ കാണുന്ന ഒരു പുതിയ അനക്കം ഈ ഗൂഢാലോചനയുടെ ഭാഗമാണെന്നും അറിയുന്നു. തെരഞ്ഞെടുപ്പ് കമ്മീഷനെതിരെ വോട്ട് മോഷണം എന്ന ആരോപണം രാഹുല്‍ ഗാന്ധി ഉന്നയിക്കുന്നതെല്ലാം ഈ ഡീപ് സ്റ്റേറ്റ് പദ്ധതിയുടെ ഭാഗമാണ്. ഇതിലൂടെ സമൂഹത്തില്‍ കലാപങ്ങളുണ്ടാക്കുക എന്നതായിരിക്കും രാഹുല്‍ ഗാന്ധി ഉള്‍പ്പെടെയുള്ള പ്രതിപക്ഷ പാര്‍ട്ടികളുടെ റോള്‍. ഇതിനായി വന്‍തോതില്‍ സിഐഎ പണം ഇന്ത്യയിലേക്ക് ഒഴുക്കുന്നുണ്ട്.
മൂന്ന് ഡി ആണ് സിഐഎ നടപ്പാക്കുന്നത്. ഡൈവേര്‍ഷന്‍ (Diversion), ഡിസെപ്ഷന്‍ (Deception), ഡിവിഷന്‍ (Division) എന്നിങ്ങനെയുള്ളതാണ് ഈ മൂന്ന് പദ്ധതികള്‍. ഡൈവേര്‍ഷന്‍ എന്നത് ശ്രദ്ധ തിരിച്ചുവിടലാണ്. ഡിസെപ്ഷന്‍ എന്നത് വഞ്ചനയാണ്. അതായത് പുകമറ സൃഷ്ടിക്കല്‍. സിഐഎയുടെയും ഡീപ് സ്റ്റേറ്റിന്റെയും യഥാര്‍ത്ഥ ഉദ്ദേശ്യം ഒന്നാണെങ്കിലും പുറമേയ്‌ക്ക് വേറെ ഒന്നാണെന്ന പ്രതീതി ജനിപ്പിക്കുകയാണ് ചെയ്യുക. ഇതിന് ഉദാഹരണമാണ് അമേരിക്കയുമായുള്ള സ്വതന്ത്ര വ്യാപാരക്കരാര്‍. ഇന്ത്യയുമായി സ്വതന്ത്രവ്യാപാരക്കരാര്‍ ഒപ്പുവെയ്‌ക്കാന്‍ അമേരിക്കയ്‌ക്ക് താല്‍പര്യമാണെന്നും എന്നാല്‍ മോദിയുടെ കടുംപിടുത്തം കാരണമാണ് അത് നടക്കാതിരിക്കുന്നതെന്ന പ്രതീതിയാണ് സിഐഎ ശക്തികള്‍ ഇന്ത്യയിലെ മാധ്യമങ്ങളിലൂടെയും പ്രതീപക്ഷ രാഷ്ടീയ നേതാക്കളിലൂടെയും പ്രചരിപ്പിക്കാന്‍ ശ്രമിക്കുന്നത്. മൂന്നാമത്തെ തന്ത്രം ഡിവിഷന്‍ എന്നതാണ്. അതായത് ബിജെപിയ്‌ക്കുള്ളിലും ബിജെപിയും ആര്‍എസ്എസും തമ്മിലും വിള്ളലുകള്‍ ഉണ്ടാക്കാനുള്ള ശ്രമമാണ് ഇതെന്ന് പറയപ്പെടുന്നു. ഈ ഭിന്നിപ്പിക്കല്‍ ശ്രമത്തിനെതിരെ ബിജെപിയും ആര്‍എസ് എസും ഒറ്റക്കെട്ടായി നിന്നുകൊണ്ട് ചെറുക്കുക മാത്രമാണ് പോംവഴി.
ഇന്ത്യയ്‌ക്കും മോദി സര്‍ക്കാരിനും എതിരെ കിട്ടുന്ന എല്ലാ സാധ്യതകളും ഉപയോഗിക്കുകയും ഡൊണാള്‍ഡ് ട്രംപിന് അനുകൂലമായി ലോകത്തിലെ എല്ലാം ചാനലുകളും പ്രവര്‍ത്തിപ്പിക്കുകയുമാണ് സിഐഎ ചെയ്യുന്നത്. അത് വഴി നരേന്ദ്രമോദി സര്‍ക്കാരിനെ ഒറ്റപ്പെടുത്താന്‍ ശ്രമം നടക്കുകയാണ്. അമേരിക്കയെയും ട്രംപിനെയും വെറുപ്പിച്ചത് മോദിയാണെന്ന പ്രതീതി ജനിപ്പിക്കാനും ഒട്ടേറെ വ്യാജവാര്‍ത്തകള്‍ മാധ്യമങ്ങളിലൂടെ പ്രചരിപ്പിക്കാനും ശ്രമം നടക്കുന്നുണ്ട്. ഇതിനെതിരെ ബിജെപി, ആര്‍എസ് എസ് നേതാക്കള്‍ ജാഗരൂകരായി നിലകൊള്ളേണ്ടത് അത്യാവശ്യമാണ്.
