തിരുവനന്തപുരം:നടനും ബി ജെ പി നേതാവുമായ കൃഷ്ണ കുമാറിന്റെ മകള്‍ ദിയ കൃഷ്ണയുടെ സ്ഥാപനത്തിലെ സാമ്പത്തിക തട്ടിപ്പില്‍ ,കേസിലെ രണ്ടാം പ്രതി പ്രതി ദിവ്യ ഫ്രാന്‍സിസ് പൊലീസിനോട് കുറ്റം സമ്മതിച്ചു.ദിവ്യയെ സ്ഥാപനത്തില്‍ എത്തിച്ച് തെളിവെടുപ്പ് നടത്തിയപ്പോഴാണ് മുന്‍ ജീവനക്കാരിയായ പ്രതി കുറ്റസമ്മതം നടത്തിയത്.
എട്ട് മാസം കൊണ്ട് 40 ലക്ഷം രൂപയാണ് ദിവ്യയുടെ അക്കൗണ്ടില്‍ വന്നത്.ഏറ്റവും കൂടുതല്‍ പണം വന്നത് ദിവ്യയുടെ അക്കൗണ്ടിലേക്കാണെന്ന് ക്രൈംബ്രാഞ്ച് വെളിപ്പെടുത്തി.ഇതില്‍ ഒരു ലക്ഷം രൂപക്ക് സ്വര്‍ണം വാങ്ങിയെന്നും ദിവ്യ ഫ്രാന്‍സിസ് പൊലീസിന് മൊഴി നല്‍കി.
ദിയ കൃഷ്ണയുടെ സ്ഥാപനത്തിലെ സാമ്പത്തിക തട്ടിപ്പില്‍ കഴിഞ്ഞ ദിവസമാണ് ദിവ്യ ഫ്രാന്‍സിസ് കീഴടങ്ങിയത്.കേസിലെ മറ്റ് പ്രതികളായ വിനീത, രാധാകുമാരി എന്നിവര്‍ നേരത്തെ കീഴടങ്ങി.ക്യൂ ആര്‍ കോഡ് വഴി പണം തട്ടിയെന്നാണ് പൊലീസിനോട് ഇവര്‍ സമ്മതിച്ചത്.ദിയയുടെ സ്ഥാപനത്തില്‍ നിന്നും 69 ലക്ഷം രൂപ ജീവനക്കാരികള്‍ തട്ടിയെടുത്തെന്നാണ് കേസ്. മൂന്ന് ജീവനക്കാരികള്‍ക്ക് എതിരെയായിരുന്നു ദിയ കൃഷ്ണയുടെ പരാതി.
ദിയയുടെ കടയില്‍ നിന്നും ജീവനക്കാരികള്‍ പണം തട്ടിയെടുത്തതിന് തെളിവുണ്ടെന്ന് അന്വേഷണ സംഘം കോടതിയെ അറിയിച്ചിരുന്നു.ഇത് ശരിവയ്‌ക്കുന്നതാണ് മൂന്ന് ജീവനക്കാരികളുടെയും ബാങ്ക് രേഖകള്‍.
ദിയയുടെ വിവാഹ ശേഷം കടയിലെ കാര്യങ്ങള്‍ നോക്കി നടത്തിയിരുന്നത് ഇവരാണ്. സാധനങ്ങള്‍ വാങ്ങുന്നവരില്‍ നിന്നും പണം ഇവരുടെ ക്യൂആര്‍ കോഡ് ഉപയോഗിച്ചാണ് സ്വീകരിച്ചിരുന്നതെന്നും ഈ പണം ദിയക്ക് കൈമാറിയിട്ടില്ലെന്നുമായിരുന്നു ദിയ പരാതി നല്‍കിയത്.നാല്‍പത് ലക്ഷത്തിന്റെ തട്ടിപ്പ് നടന്നെന്നാണ് ഇതുവരെ പൊലീസ് കണ്ടെത്തിയിരിക്കുന്നത്. തട്ടിയെടുത്ത പണം പ്രതികള്‍ പങ്കിട്ടെടുത്തു.
