തിരുവനന്തപുരം: പാര്‍ട്ടി നേതാക്കള്‍ ജ്യോത്സനെ കാണുന്നതിനെ വിമര്‍ശിച്ച് സിപിഎം സംസ്ഥാന സമിതിയില്‍ കണ്ണൂരില്‍ നിന്നുളള മുതിര്‍ന്ന നേതാവ്. നേതാക്കള്‍ ജ്യോത്സനെ കാണാന്‍ പോകുന്നത് എന്ത് രാഷ്‌ട്രീയ ബോധ്യത്തിന്റെ അടിസ്ഥാനത്തിലാണെന്ന് മുതിര്‍ന്ന നേതാവ് ചോദ്യമുയര്‍ത്തി. നേതാക്കളുടെ ഇത്തരം നടപടികള്‍ പാര്‍ട്ടിക്ക് ദോഷം ചെയ്യും എന്നും നേതാവ് മുന്നറിയിപ്പ് നല്‍കി. ആരുടെയും പേര് പറയാതെ ആയിരുന്നു വിമര്‍ശനം
വ്യാഴാഴ്ച നടന്ന സിപിഎം സംസ്ഥാന സമിതി യോഗത്തില്‍ ചര്‍ച്ചയ്‌ക്കിടെയാണ് മുതിര്‍ന്ന നേതാവ് ജ്യോത്സ്യനെ കാണാന്‍ പോയതില്‍ വിമര്‍ശനം ഉയര്‍ന്നത്. ആരെ ഉദ്ദേശിച്ചാണ് വിമര്‍ശനമെന്ന് ഏറെക്കുറെ വ്യക്തമായിരുന്നു എങ്കിലും വിമര്‍ശനമുന്നയിച്ച നേതാവ് ആരുടെയും പേര് പരാമര്‍ശിച്ചില്ല.
അടിക്കടി നേതാവ് ജ്യോത്സനെ കാണാന്‍ പോകുന്നതിനെ വിമര്‍ശനമുന്നയിച്ച കണ്ണൂര്‍ നേതാവ് ചോദ്യം ചെയ്തു.പാര്‍ട്ടിയുടെ സല്‍ പേരിനെ കരുതി നേതാക്കള്‍ ഇത്തരം നടപടികള്‍ നിന്ന് പിന്മാറണമെന്നും ആവശ്യപ്പെട്ടു.ഒരു പ്രധാന സി പി എം നേതാവ് പയ്യന്നൂരില്‍ ഉള്ള പ്രശസ്ത ജ്യോത്സ്യനെ കാണാന്‍ പോയത് സാമൂഹിക മാധ്യമങ്ങളില്‍ വലിയ ചര്‍ച്ചയായിരുന്നു. ജ്യോതിഷനൊപ്പമുള്ള നേതാവിന്റെ ചിത്രങ്ങളും പുറത്തുവന്നു.
ഇത് മനസില്‍ വച്ചാണ് കണ്ണൂര്‍ നേതാവ് സംസ്ഥാന സമിതിയില്‍ വിമര്‍ശനം ഉന്നയിച്ചത് എന്നാണ് നിഗമനം.പാലക്കാട് പ്ലീനം അംഗീകരിച്ച റിപ്പോര്‍ട്ടില്‍ പാര്‍ട്ടി നേതാക്കളും പ്രവര്‍ത്തകരും അന്ധവിശ്വാസങ്ങള്‍ക്ക് അടിമപ്പെടരുതെന്ന് ആവശ്യപ്പെട്ടിരുന്നു.
