തിരുവനന്തപുരം: ബ്യൂട്ടി പാര്ലറിലെ സാധനങ്ങളുമായി നഗരത്തിലൂടെ സഞ്ചരിച്ച ലോറിയില് തീപിടിച്ചത് ആശങ്കയ്ക്കിടയാക്കി. കരമന പാലത്തിന് സമീപമാണ് ലോറിക്ക് തീപിടിച്ചത്. കാരയ്ക്കാമണ്ഡപത്തിന് സമീപം നിന്നും കൊല്ലത്തേക്ക് പോയ ലോറിയിലാണ് പുലര്ച്ചെ ഒരു മണിയോടെ തീപടര്ന്നത്.
ലോറിയില് നിന്നും പുക ഉയരുന്നത് കണ്ട പിന്നാലെ വന്ന വാഹനങ്ങളിലെ യാത്രികരാണ് തീപിടിച്ച കാര്യം ലോറി ഡ്രൈവറുടെ ശ്രദ്ധയില്പെടുത്തിയത്. ഇതോടെ കരമന പാലത്തിന് സമീപം വാഹനം നിറുത്തി.
ഡ്രൈവറും കൂടെയുണ്ടായിരുന്നവരും ബക്കറ്റില് വെള്ളമൊഴിച്ച് തീ കെടുത്താന് ശ്രമിച്ചെങ്കിലും നടക്കാതായതോടെ അഗ്നിരക്ഷാ സേനയുടെ രണ്ട് യൂണിറ്റ് എത്തി തീയണച്ചു. പെട്ടെന്ന് എത്തിയതിനാല് തീയണയ്ക്കാനായെന്നും ഡീസല് ടാങ്കിലേക്ക് തീപടര്ന്നിരുന്നെങ്കില് വലിയ അപകടമുണ്ടാകുമായിരുന്നെന്നും അഗ്നിരക്ഷാ സേനാംഗങ്ങള് പറഞ്ഞു.
