മുംബൈ: താൻ ഗുരുതരമായ ആരോഗ്യപ്രശ്നങ്ങൾ നേരിടുകയാണെന്ന ഞെട്ടിക്കുന്ന വെളിപ്പെടുത്തലുമായി ബോളിവുഡ് സൂപ്പർതാരം സൽമാൻ ഖാൻ. തലച്ചോറിലെ രക്തക്കുഴലിൽ ഒരു മുഴയുണ്ടെന്നും (ബ്രെയിൻ അനൂറിസം), ഇതിന് പുറമെ മറ്റ് പല രോഗാവസ്ഥകളുണ്ടായിട്ടും താൻ ജോലി തുടരുകയാണെന്നും 59-കാരനായ താരം പറഞ്ഞു. നെറ്റ്ഫ്ലിക്സിലെ ‘ദി ഗ്രേറ്റ് ഇന്ത്യൻ കപിൽ ഷോ’യിൽ അതിഥിയായി എത്തിയപ്പോഴായിരുന്നു സൽമാന്റെ ഈ തുറന്നുപറച്ചിൽ.
എന്റെ വാരിയെല്ലുകൾ പൊട്ടിയിരിക്കുകയാണ്, തലച്ചോറിൽ ഒരു അനൂറിസമുണ്ട്, ട്രൈജെമിനൽ ന്യൂറാൾജിയ എന്ന രോഗാവസ്ഥയുണ്ട്. എന്നിട്ടും ഞാൻ എല്ലാ ദിവസവും ഇവിടെ എല്ലുമുറിയെ പണിയെടുക്കുകയാണ്,” എന്നാണ് സൽമാൻ ഖാൻ ഷോയിൽ പറഞ്ഞത്. താരത്തിന്റെ വെളിപ്പെടുത്തൽ ആരാധകരെ വലിയ ആശങ്കയിലാഴ്ത്തിയിട്ടുണ്ട്
എന്താണ് ബ്രെയിൻ അനൂറിസം?
തലച്ചോറിലെ രക്തക്കുഴലുകളുടെ ദുർബലമായ ഭിത്തിയിൽ ഉണ്ടാകുന്ന ഒരുതരം മുഴയെയോ വീക്കത്തെയോ ആണ് ബ്രെയിൻ അനൂറിസം എന്ന് പറയുന്നത്. രക്തം ഈ മുഴയിലേക്ക് ശക്തിയായി തള്ളിക്കയറുമ്പോൾ, അതൊരു ബലൂൺ പോലെ വീർത്ത് വരികയും, ഏത് നിമിഷവും പൊട്ടാൻ സാധ്യതയുള്ള അവസ്ഥയിലാവുകയും ചെയ്യും
അപകടം എപ്പോൾ?: ഈ മുഴ പൊട്ടിയാൽ, തലച്ചോറിനുള്ളിൽ രക്തസ്രാവമുണ്ടാകുകയും, ഇത് ജീവന് തന്നെ ഭീഷണിയാവുകയും ചെയ്യും. ‘ഇടിമുഴക്കം പോലുള്ള തലവേദന’ (thunderclap headache) ആണ് ഇതിന്റെ പ്രധാന ലക്ഷണം.
ആർക്കൊക്കെ വരാം?: 30-നും 60-നും ഇടയിൽ പ്രായമുള്ളവരിലാണ് ഇത് കൂടുതലായി കാണുന്നത്. സ്ത്രീകളിലാണ് പുരുഷന്മാരെക്കാൾ സാധ്യത കൂടുതൽ.
മറ്റ് ലക്ഷണങ്ങൾ
മിക്ക അനൂറിസങ്ങളും ചെറുതായതിനാൽ പ്രകടമായ ലക്ഷണങ്ങൾ കാണിക്കണമെന്നില്ല. എന്നാൽ, മുഴ വലുതായാൽ തലവേദന, കാഴ്ച മങ്ങൽ, ഓക്കാനം, ഛർദ്ദി, വെളിച്ചത്തിലേക്ക് നോക്കാൻ ബുദ്ധിമുട്ട്, അപസ്മാരം തുടങ്ങിയ ലക്ഷണങ്ങൾ ഉണ്ടാകാം.
മുൻപും, ‘ആത്മഹത്യാ രോഗം’ എന്ന് വിളിക്കപ്പെടുന്ന, മുഖത്തെ ഞരമ്പുകളെ ബാധിക്കുന്ന ട്രൈജെമിനൽ ന്യൂറാൾജിയ എന്ന രോഗാവസ്ഥയെക്കുറിച്ച് സൽമാൻ തുറന്നുപറഞ്ഞിട്ടുണ്ട്. കടുത്ത ആരോഗ്യ വെല്ലുവിളികൾക്കിടയിലും സിനിമയിലും പൊതുവേദികളിലും സജീവമായി തുടരുന്ന താരത്തിന്റെ വെളിപ്പെടുത്തൽ വലിയ ചർച്ചകൾക്കാണ് വഴിവെച്ചിരിക്കുന്നത്.
