ന്യൂദൽഹി : കഴിഞ്ഞ വർഷം 25 കേസുകളിലായി 68 പ്രതികളെ ശിക്ഷിച്ചതിലൂടെ 100 ശതമാനം ശിക്ഷാ നിരക്ക് കൈവരിച്ചതായി ദേശീയ അന്വേഷണ ഏജൻസി അറിയിച്ചു. ഇരകൾക്ക് നീതി നൽകുന്നതിനും ദേശീയ സുരക്ഷ ശക്തിപ്പെടുത്തുന്നതിനുമുള്ള ഏജൻസിയുടെ പ്രതിബദ്ധതയെ അടിവരയിടുന്നതാണ് ഈ നേട്ടമെന്ന് ഏജൻസി വ്യക്തമാക്കി.
കർശനമായ അന്വേഷണങ്ങളും സൂക്ഷ്മമായ നിയമ തന്ത്രങ്ങളുമാണ് ഈ വിജയത്തിന് കാരണമെന്ന് ഉദ്യോഗസ്ഥർ പറഞ്ഞു. ഈ നേട്ടം എൻഐഎയെ സംബന്ധിച്ചിടത്തോളം സുപ്രധാനമായ ഒരു നാഴികക്കല്ലായി അടയാളപ്പെടുത്തുന്നുവെന്നും രാജ്യത്തെ ഏറ്റവും വലിയ അന്വേഷണ ഏജൻസികളിലൊന്നെന്ന ഖ്യാതി കൂടുതൽ ദൃഢമാക്കുന്നുവെന്നും ഉദ്യോഗസ്ഥർ പറഞ്ഞു.
2024ൽ എൻഐഎ രജിസ്റ്റർ ചെയ്ത 80 കേസുകളിലായി 210 പ്രതികളെയാണ് അറസ്റ്റ് ചെയ്തതെന്ന് ഏജൻസി അറിയിച്ചു. ഇതിൽ യഥാക്രമം 28-ഉം 18-ഉം കേസുകളിൽ ഇടത് പക്ഷ തീവ്രവാദവും നോർത്ത് ഈസ്റ്റ് കലാപവുമാണ് പട്ടികയിൽ മുന്നിലുള്ളതെന്ന് ഏജൻസി പറഞ്ഞു.
ഏഴ് ജമ്മു കശ്മീർ ജിഹാദി കേസുകൾക്ക് പിന്നാലെ ആറ് ബോംബ് ആക്രമണ കേസുകളും അഞ്ച് മനുഷ്യക്കടത്ത് കേസുകളും ഉണ്ടായി. കൂടാതെ മറ്റ് നാല് ജിഹാദി കേസുകളും നാല് ഖാലിസ്ഥാൻ കേസുകളും, രണ്ട് ഐസിസ് ജിഹാദി കേസുകളും ഗുണ്ടാസംഘങ്ങൾ, സൈബർ ഭീകരത, വ്യാജ ഇന്ത്യൻ കറൻസി നോട്ടുകൾ തുടങ്ങിയ വിഭാഗങ്ങളിലായി ഓരോ കേസും രജിസ്റ്റർ ചെയ്തിട്ടുണ്ടെന്ന് ഏജൻസി വ്യക്തമാക്കി.
കൂടാതെ 25 കേസുകളിലായി 68 പ്രതികളുടെ ശിക്ഷാവിധിക്ക് പുറമെ, 408 പ്രതികളുടെ കുറ്റപത്രം സമർപ്പിച്ചത് 2024 ലെ മികച്ച പ്രകടനമാണെന്ന് എൻഐഎ പറഞ്ഞു. വിവിധ തീവ്രവാദികളെയും ഗുണ്ടാസംഘങ്ങളെയും മറ്റ് ക്രിമിനൽ ശൃംഖലകളെയും തകർക്കാനുള്ള ഏജൻസിയുടെ നിരന്തരമായ ശ്രമങ്ങളുടെ ഭാഗമായി 19.57 കോടി രൂപ വിലമതിക്കുന്ന 137 സ്വത്തുക്കൾ കഴിഞ്ഞ വർഷം കണ്ടുകെട്ടിയിട്ടുണ്ട്.
പ്രധാനമായും ഇടതുപക്ഷ തീവ്രവാദം വർഷം മുഴുവനും ഏജൻസിയുടെ സ്കാനറിന് കീഴിൽ തുടർന്നുവെന്നതാണ്. ഇടതുപക്ഷ തീവ്രവാദവുമായി ബന്ധപ്പെട്ട് ഇരുപത്തിയെട്ട് കേസുകൾ രജിസ്റ്റർ ചെയ്തു. ഈ വിഭാഗത്തിൽ 64 പ്രതികൾക്കെതിരെ 12 കുറ്റപത്രങ്ങൾ സമർപ്പിച്ചു. വടക്കുകിഴക്കൻ കലാപവും എൻഐഎയുടെ റഡാറിൽ ഉയർന്നിരുന്നു. ഇതിൽ 15 അറസ്റ്റുകൾ നടന്നിട്ടുണ്ട്.
അസമിൽ ഉൾഫ (ഐ) നടത്തിയ സ്വാതന്ത്ര്യദിന ബഹിഷ്കരണ ആഹ്വാനത്തിൽ രണ്ട് വ്യത്യസ്ത കേസുകളിലായി അഞ്ച് പ്രതികളെ അറസ്റ്റ് ചെയ്തു. വളർന്നുവരുന്ന ഭീകരസംഘത്തെ അടിച്ചമർത്തലും കഴിഞ്ഞ വർഷത്തെ പ്രധാന ഹൈലൈറ്റായിരുന്നു. വിദേശത്തുനിന്നുള്ള ഖാലിസ്ഥാനി ഭീകരവാദ കേസുകളുമായി ബന്ധപ്പെട്ട് 14 പ്രതികളെ എൻഐഎ അറസ്റ്റ് ചെയ്തു. കൂടാതെ ഈ കേസുകളിൽ 101 തിരച്ചിലുകൾ നടത്തി. 2024-ൽ എല്ലാത്തരം കേസുകളിലുമായി മൊത്തം 662 തിരച്ചിലുകൾ നടത്തി.
ഇതിനു പുറമെ കഴിഞ്ഞ വർഷം ഗുണ്ടാസംഘവുമായി ബന്ധപ്പെട്ട കേസുകളിൽ പതിമൂന്ന് അറസ്റ്റുകൾ നടന്നു. വിഎച്ച്പി നേതാവ് വികാസ് പ്രഭാകർ എന്ന വികാസ് ബഗ്ഗയുടെ കൊലപാതകത്തിൽ പാകിസ്ഥാൻ ആസ്ഥാനമായുള്ള ബബ്ബർ ഖൽസ ഇൻ്റർനാഷണൽ (ബികെഐ) തലവൻ വാധവ സിംഗ് എന്ന ബബ്ബറിനേയും മറ്റ് അഞ്ച് ഭീകരർക്കെതിരെയും കുറ്റപത്രം സമർപ്പിച്ചു. അതുപോലെ വിദേശ ആസ്ഥാനമായുള്ള തീവ്രവാദി ഗോൾഡി ബ്രാർ ഉൾപ്പെടെ 10 പ്രതികൾക്കെതിരെ അതിവേഗം കുറ്റപത്രം സമർപ്പിച്ചു. ഫിലിപ്പൈൻസിൽ നിന്നുള്ള ഖാലിസ്ഥാൻ ടെററിസ്റ്റ് ഫോഴ്സ് (കെടിഎഫ്) അംഗങ്ങളായ മൻപ്രീത് സിംഗ് എന്ന പീറ്റ, മൻദീപ് സിംഗ് എന്നിവർക്കെതിരെയും എൻഐഎ കുറ്റപത്രം സമർപ്പിച്ചിരുന്നു.
കൂടാതെ നിരോധിത സംഘടനയായ ബബ്ബർ ഖൽസ ഇൻ്റർനാഷണൽ (ബികെഐ) സംഘടനയുമായി ബന്ധപ്പെട്ട ഭീകര ഗൂഢാലോചന കേസിൽ മുഖ്യ സൂത്രധാരൻ കുൽവീന്ദർജീത് സിംഗ് എന്ന ഖാൻപൂരിയ ഉൾപ്പെടെ നാല് ഭീകരരുടെ ശിക്ഷയും എൻഐഎ ഉറപ്പിച്ചു.
