മെൽബൺ : ഇന്ത്യയും ഓസ്‌ട്രേലിയയും തമ്മിൽ മെൽബൺ ഗ്രൗണ്ടിനുള്ളിൽ ഏറ്റുമുട്ടുന്നതിനിടെ ഗ്രൗണ്ടിന് പുറത്ത് ഇന്ത്യൻ പൗരന്മാരും ഖാലിസ്ഥാൻ അനുയായികളും തമ്മിൽ ഏറ്റുമുട്ടൽ . മെൽബൺ ക്രിക്കറ്റ് ഗ്രൗണ്ടിന് പുറത്ത് തടിച്ചുകൂടിയ നിരവധി ഖാലിസ്ഥാൻ അനുകൂലികൾ ഇന്ത്യ വിരുദ്ധ മുദ്രാവാക്യം വിളിച്ചതായി റിപ്പോർട്ടുകൾ പറയുന്നു. ഖലിസ്ഥാൻ പതാകയുമേന്തി ഇന്ത്യ വിരുദ്ധ മുദ്രാവാക്യം വിളിച്ചെത്തിയവർക്ക് മുന്നിൽ ചങ്കുറപ്പോടെയാണ് ജയ് ഹിന്ദ് മുഴക്കി ഇന്ത്യൻ ആരാധകർ ത്രിവർണ പതാക വീശി എത്തിയത്.
ബോക്സിംഗ് ഡേ ടെസ്റ്റ് മത്സരം കാണാൻ ധാരാളം ആരാധകർ മെൽബൺ ക്രിക്കറ്റ് ഗ്രൗണ്ടിലേക്ക് എത്തിയിരുന്നു . ആതിഥേയരായ ഓസ്‌ട്രേലിയയുടെ ആരാധകർ മാത്രമല്ല ഇന്ത്യൻ ആരാധകരും ത്രിവർണ പതാകയുമായി ഗ്രൗണ്ടിലെത്തി. നിരവധി ആരാധകരാണ് സ്റ്റേഡിയത്തിന് പുറത്തും തടിച്ചുകൂടിയത്. ഈ സമയം സ്റ്റേഡിയത്തിന് പുറത്ത് എത്തിയ ഖാലിസ്ഥാൻ അനുകൂലികൾ മഞ്ഞക്കൊടി ഉയർത്തി ഇന്ത്യാ വിരുദ്ധ മുദ്രാവാക്യം വിളിച്ചു. ടിക്കറ്റില്ലാതെ ഇവർ സ്റ്റേഡിയത്തിൽ പ്രവേശിക്കാൻ ശ്രമിച്ചെങ്കിലും സുരക്ഷാ ഉദ്യോഗസ്ഥർ തടഞ്ഞു.
ഗ്രൗണ്ടിൽ കയറി ഇന്ത്യയ്‌ക്കെതിരെ മുദ്രാവാക്യം വിളിക്കാനായിരുന്നു ഇവരുടെ പദ്ധതി. എന്നാൽ അത് സാധ്യമാകാതെ വന്നപ്പോൾ സ്റ്റേഡിയത്തിന് പുറത്ത് ഇന്ത്യക്കെതിരെ മുദ്രാവാക്യം വിളിക്കുകയും ഇന്ത്യൻ ത്രിവർണ പതാകയെ അപമാനിക്കുകയും ചെയ്തു. തുടർന്നാണ് ഇതെല്ലാം കണ്ട് നിന്ന ഇന്ത്യൻ യുവാക്കൾ ത്രിവർണ്ണപതാകയുമേന്തി ഖലിസ്ഥാൻ അനുകൂലികളുടെ അടുത്തെത്തിയത് . ഖാലിസ്ഥാൻ അനുകൂലികൾക്കെതിരെ മുദ്രാവാക്യം വിളിക്കുകയും ചെയ്തു. സ്ഥിതിഗതികൾ കൈവിടുംമുമ്പ് പോലീസ് ഇടപെട്ട് ഖാലിസ്ഥാൻ അനുകൂലികളെ പുറത്താക്കി.
