കപൂർത്തല ; പഞ്ചാബിൽ യുവമോർച്ച നേതാവിനെ കൊലപ്പെടുത്തി . സുൽത്താൻപൂർ ലോധിയിൽ ബ്ലോക്ക് പ്രസിഡൻ്റ് ഹണി കുമാറിനെയാണ് വെട്ടിക്കൊലപ്പെടുത്തിയത്. വ്യാഴാഴ്ച രാത്രിയാണ് സംഭവം. സംഭവത്തിൽ ഒരാളെ പോലീസ് കസ്റ്റഡിയിലെടുത്തിട്ടുണ്ട്, കൊലപാതകത്തിന്റെ കാരണം അന്വേഷിച്ചുവരികയാണ്.
ഹണികുമാറും സുഹൃത്തുക്കളായ അജയ്‌കുമാറും അമൻകുമാറും രാത്രി മോട്ടോർ സൈക്കിളിൽ മാർക്കറ്റിലേയ്‌ക്ക് പോകുന്നതിനിടെയായിരുന്നു ആക്രമണം . നേരത്തെ അവിടെയുണ്ടായിരുന്ന അക്രമികൾ സംഘം ചേർന്ന് ഇവരെ ആക്രമിക്കുകയായിരുന്നു. ഗുരുതരമായി പരിക്കേറ്റ എല്ലാവരെയും പ്രാദേശിക സർക്കാർ ആശുപത്രിയിൽ പ്രവേശിപ്പിച്ചു. ചികിത്സയ്‌ക്കിടെയാണ് ഹണികുമാർ മരിച്ചത് . അജയ്, അമൻ എന്നിവരുടെ ചികിത്സ തുടരുകയാണ്.
പഴയ വൈരാഗ്യമാകാം ആക്രമണത്തിന് പിന്നിലെന്ന് സുൽത്താൻപൂർ ലോധി ഡെപ്യൂട്ടി പോലീസ് സൂപ്രണ്ട് സുഖ്പാൽ സിംഗ് പറഞ്ഞു. ഹണികുമാർ താമസിച്ചിരുന്ന അതേ പ്രദേശത്തെ താമസക്കാരാണ് അക്രമികളെന്ന് പ്രാഥമിക അന്വേഷണത്തിൽ വ്യക്തമായിട്ടുണ്ട്.കൊലപാതകത്തിന് പിന്നിലെ കാരണം കണ്ടെത്താൻ സമഗ്രമായ അന്വേഷണം നടക്കുകയാണെന്ന് പോലീസ് പറഞ്ഞു. സംഭവസ്ഥലത്ത് സ്ഥാപിച്ചിട്ടുള്ള സിസിടിവി ദൃശ്യങ്ങൾ പരിശോധിച്ചുവരികയാണ്. കൂടാതെ കസ്റ്റഡിയിലെടുത്ത ആളെ ചോദ്യം ചെയ്തു വരികയാണ്.
