കൊച്ചി:രാജ്യത്ത് നിരോധനമുളള സാറ്റലൈറ്റ് ഫോണുമായി നെടുമ്പാശേരി വിമാനത്താവളത്തില്‍ വിദേശി പിടിയില്‍. ജര്‍മ്മന്‍ സ്വദേശി അറ്റ്മാന്‍ ക്ലസിങ്ങോയാണ് പിടിയിലായത്.
ഇന്‍ഡിഗോ വിമാനത്തില്‍ മുംബൈയിലേക്ക് പോകാനെത്തിയതായിരുന്നു ഇയാള്‍. ഇക്കഴിഞ്ഞ 5 ന് ബെംഗളൂരുവില്‍ വന്നിറങ്ങിയ ഇയാള്‍ രാജ്യത്ത് നിരവധി സ്ഥലങ്ങളില്‍ എത്തിയിരുന്നു.
നെടുമ്പാശേരി പൊലീസ് ഇയാള്‍ക്കെതിരെ കേസെടുത്തു. ഫോണും പിടിച്ചെടുത്തു. ഫോണ്‍ ചൊവ്വാഴ്ച കോടതിയില്‍ ഹാജരാക്കും. അതേസമയം, സാറ്റലൈറ്റ് ഫോണിന് ഇന്ത്യയില്‍ നിരോധനമുണ്ടെന്ന് അറിയില്ലായിരുന്നുവെന്നാണ് ഇയാള്‍ പറഞ്ഞത്.
