കൊച്ചി: സീനിയര്‍ പെണ്‍കുട്ടികളുടെ പോള്‍വാള്‍ട്ട് സ്വര്‍ണത്തിനും ഇക്കുറി റിക്കാഡ് തിളക്കം. കോതമംഗലം മാര്‍ബേസില്‍ സ്‌കൂളില്‍ നിന്നുള്ള ജീന ബേസില്‍ ആണ് ഒമ്പത് വര്‍ഷം പഴക്കമുള്ള റിക്കാര്‍ഡ് തിരുത്തിയത്. തലേന്ന് സീനിയര്‍ ബോയ്‌സില്‍ മാര്‍ ബേസില്‍ സ്‌കൂളിലെ ശിവദേവ് റിക്കാഡ് നേട്ടം കുറിച്ചിരുന്നു.
പ്ലസ് ടു വിദ്യാര്‍ത്ഥിയായ ജീന 3.43 മീറ്റര്‍ ഉയരം താണ്ടിയാമ് റിക്കാഡ് സ്ഥാപിച്ചത്. 2015ല്‍ പാലാ സെന്റ്‌മേരീസ് ഗേള്‍സ് എച്ച്എസ്എസിന് വേണ്ടി മരിയ ജെയ്‌സണിന്റെ പേരിലായിരുന്നു റിക്കാര്‍ഡ്.
അഞ്ചാമത്തെ സംസ്ഥാന സ്‌കൂള്‍ മീറ്റില്‍ പങ്കെടുക്കുന്ന ജീനയുടെ നാലാമത്തെ സുവര്‍ണ നേട്ടമാണിത്. 2020 മുതല്‍ പെണ്‍കുട്ടികളുടെ പോള്‍വോള്‍ട്ടില്‍ ജീനയ്‌ക്ക് എതിരില്ല. സാമ്പത്തിക പരാധീനകള്‍ക്കിടയിലാണ് ജീനയുടെ വിജയമെന്നത് ഈ സുവര്‍ണനേട്ടത്തിന് വീണ്ടും തിളക്കമേറ്റുന്നു. സ്‌കൂളധികൃതരുടെയും നാട്ടുകാരുടെയും സഹായത്തോടെയാണ് ജീന മത്സരങ്ങളില്‍ പങ്കെടുക്കുന്നത്. 3.50 മീറ്റര്‍ താണ്ടാനുള്ള ശ്രമത്തിനിടെ പോള്‍ വീണ് ജീനയുടെ മൂക്കിന് പരിക്കേറ്റു.
ബീഹാറിലെ പട്‌നയില്‍ നടന്ന ദേശീയ സ്‌കൂള്‍ ഗെയിംസിലും ജീന സ്വര്‍ണം നേടിയിരുന്നു. കര്‍ഷകനും കോതമംഗലം ഊന്നുകല്‍ സ്വദേശിയുമായ ബേസില്‍ വര്‍ഗ്ഗീസിന്റെയും മഞ്ജുവിന്റെയും മകളാണ് ജീന. സഹോദരി ജിനിയ സേലത്ത് നഴ്‌സിംഗ് വിദ്യാര്‍ത്ഥിയാണ്.
ഉയരപ്പോരാട്ടത്തില്‍ ജീനയുടെ എതിരാളി മാര്‍ബേസിലിലെ തന്നെ എമി ട്രീസ ജിജിയായിരുന്നു. എന്നാല്‍ 2.70 മീറ്റര്‍ ചാടി എമി രണ്ടാമതായി. കോഴിക്കോട് മേപ്പയൂര്‍ ഗവ. വി എച്ച് എസ് എസിലെ എസ് ജാന്‍വി 2.30 മീറ്റര്‍ താണ്ടി വെങ്കലം നേടി.
ജന്മഭൂമി ഓണ്‍ലൈന്‍