കൊച്ചി: ഐഎസ്എല്‍ പുതിയ സീസണില്‍ കേരള ബ്ലാസ്റ്റേഴ്സിന്റെ ആദ്യ ഹോം മത്സരം അനിശ്ചിതത്വത്തില്‍.കേരള ബ്ലാസ്റ്റേഴ്സും ജിസിഡിഎയുമായി വാടക കരാറില്‍ എത്താനാകാത്തതാണ് കാരണം.കൊച്ചി കലൂര്‍ ജവഹര്‍ലാല്‍ നെഹ്റു സ്റ്റേഡിയത്തിന്റെ വാടകത്തുകയെച്ചൊല്ലിയുള്ള തര്‍ക്കമാണ് മത്സര നടത്തിപ്പ് അനിശ്ചിതത്വത്തിലാക്കിയത്.
കേരള ബ്ലാസ്റ്റേഴ്സിന്റെ സീസണിലെ ആദ്യ ഹോം മത്സരത്തിന് നാലു ദിവസം മാത്രമാണ് ശേഷിക്കുന്നത്.
ഞായറാഴ്ച മുംബയ് സിറ്റി എഫ്സിയുമായാണ് ബ്ലാസ്റ്റേഴ്സിന്റെ ആദ്യ ഹോം മത്സരം.
സീസണിലെ ഓരോ മത്സരത്തിനും എട്ട് മുതല്‍ ഒമ്പത് ലക്ഷം രൂപ വരെ വാടക വേണമെന്നാണ് ജിസിഡിഎയുടെ ആവശ്യം.കഴിഞ്ഞ സീസണില്‍ മൂന്നര ലക്ഷം രൂപയായിരുന്നു വാടക. സൂപ്പര്‍ ലീഗ് കേരളയില്‍ കളിക്കുന്ന കൊച്ചി ഫോഴ്സ എഫ്സിക്ക് രണ്ട് ലക്ഷം രൂപ നിരക്കിലാണ് ജിസിഡിഎ സ്റ്റേഡിയം വിട്ടു നല്‍കിയതെന്ന് ബ്ലാസ്റ്റേഴ്സ് അധികൃതര്‍ പറഞ്ഞു.
സാധാരണയായി ഹോം മത്സരങ്ങള്‍ക്ക് പത്ത് ദിവസം മുമ്പെങ്കിലും ടിക്കറ്റ് വില്‍പ്പന ആരംഭിക്കും. എന്നാല്‍ മത്സരം നടക്കുമോ എന്നതില്‍ വ്യക്തതയില്ലാത്തതിനാല്‍ ടിക്കറ്റ് വില്‍പ്പന ഇതുവരെയും തുടങ്ങിയിട്ടില്ല.
