കോട്ടയം: കായിക കേരളത്തെ നിരാശരാക്കിയ വാര്ത്തയായിരുന്നു കേരള സ്കൂള് കായിക മേളയില് പോളില്ലാത്തതിനാല് സീനിയര് ആണ്കുട്ടികളുടെ പോള് വോള്ട്ടില് മത്സരിക്കാനാകാതെ വന്ന അടിമാലി എസ്എന്ഡിപി ഹയര് സെക്കന്ഡറി സ്കൂള് വിദ്യാര്ത്ഥി അലന് ഷിബോയിയെക്കുറിച്ചുള്ളത്. മികച്ച പോള് വോള്ട്ട് താരമായ അലന് മത്സരിക്കാനാകാത്ത സാഹചര്യത്തെക്കുറിച്ച് ജന്മഭൂമിയിലെ വാര്ത്ത കണ്ട പ്രശസ്ത പാചക വിദഗ്ധന് പഴയിടം മോഹനന് നമ്പൂതിരി അലനു പോള് നല്കാന് തീരുമാനിക്കുകയായിരുന്നു. സ്കൂള് കായിക മേളയില് മത്സരിക്കാനാകാതെ നിരാശയോടെ മടങ്ങുന്ന അലന്റെ മുഖം കണ്ട പഴയിടം രണ്ടാമതൊന്നാലോചിക്കാതെ പോള് നല്കുകയായിരുന്നു. ഒന്നേ കാല് ലക്ഷത്തോളം രൂപയുടെ പോള് അമേരിക്കയില് നിന്ന് ഇറക്കുമതി ചെയ്തതാണ്. സ്പോര്ട്സ് സാധനങ്ങളുടെ വില്പന കേന്ദ്രമായ പാലാ ടേക്ക് ഓഫില് നിന്ന് വാങ്ങിയ പോള് കഴിഞ്ഞ ദിവസം അലന് കൈമാറി.
ജന്മഭൂമി ന്യൂസ് എഡിറ്ററും കേരള സ്പോര്ട്സ് ജേര്ണലിസ്റ്റ്സ് അസോസിയേഷന് സെക്രട്ടറിയുമായ സി.കെ. രാജേഷ്കുമാര് അലന് പോള് കൈമാറി. പരിശീലകന് അമല് ജോര്ജും ചടങ്ങില് പങ്കെടുത്തു. തിരക്കുകള് മൂലം പഴയിടത്തിന് ചടങ്ങില് പങ്കെടുക്കാനായില്ല. എങ്കിലും അലന്റെ പ്രവര്ത്തനങ്ങള്ക്ക് പഴയിടം ആശംസയറിയിച്ചു. കേരളത്തിന് അഭിമാനമാകുന്ന കായിക താരമായി അലന് മാറട്ടെയെന്ന് അദ്ദേഹം ആശംസിച്ചു.
ഗുണമേന്മയുള്ള പോള് വാങ്ങിത്തന്ന പഴയിടം മോഹനന് നമ്പൂതിരിക്ക് അലനും കോച്ച് അമല് ജോര്ജും നന്ദി പറഞ്ഞു. തന്റെ ഉത്തരവാദിത്തം മറക്കാതെ ഈ മേഖലയില് ഉറച്ചുനിന്ന് പോരാടുമെന്ന് അലന് പറഞ്ഞു. അലന് കോതമംഗലം മാര് ബേസിലില് തുടര് പരിശീലനം നടത്തുന്നു.
