കൊച്ചി: മാധ്യമ സ്വാതന്ത്ര്യം നിയന്ത്രിക്കാനാവില്ലെന്ന് ഹൈക്കോടതി. അത് ഭരണഘടനാപരമായ അവകാശമാണെന്നും കോടതി പറഞ്ഞു. മാധ്യമങ്ങളെ നിയന്ത്രിക്കണമെന്ന ഹര്ജി തീര്പ്പാക്കിയാണ് ഹൈക്കോടതി ഇക്കാര്യം വ്യക്തമാക്കിയത്.
ക്രിമിനല് കേസുകളില് ആരെയും കുറ്റക്കാരെന്നോ നിരപരാധിയെന്നോ ചിത്രീകരിച്ചുളള വാര്ത്ത ഒഴിവാക്കണം. വ്യക്തിസ്വാതന്ത്ര്യം ഹനിക്കുന്ന നടപടികള് മാധ്യമങ്ങളില് നിന്നുണ്ടായാല് കോടതിയെ സമീപിക്കാനുളള അവകാശം ഭരണഘടനയും നിയമങ്ങളും നല്കുന്നുണ്ട്. അഭിപ്രായ സ്വാതന്ത്ര്യം ഭരണഘടന ഉറപ്പുനല്കുന്ന മൗലികാവകാശമാണെന്നും അഭിപ്രായ സ്വാതന്ത്ര്യത്തെ നിയന്ത്രിക്കാന് ഭരണഘടനാപരമായ മാര്ഗമുണ്ടെന്നും കോടതി ഉത്തരവില് പറയുന്നു.
വിചാരണ കാത്തുകിടക്കുന്നതോ വിചാരണ നടക്കുന്നതോ ആയ കേസുകളില് മാധ്യമങ്ങള് തീര്പ്പ് കല്പ്പിച്ചാല് ഭരണഘടനാപരമായി മാധ്യമ സ്വാതന്ത്യത്തിന് നല്കുന്ന പരിരക്ഷ ലഭിക്കില്ലെന്ന് കോടതി ചൂണ്ടിക്കാട്ടി. ഉത്തരവാദിത്തത്തോടെയുള്ള സമീപനമാണ് മാധ്യമങ്ങള് പുലര്ത്തേണ്ടത്.
മാധ്യമ ഇടപെടലില് സത്പേര് കളങ്കപ്പെടുമെന്ന് തോന്നിയാല് അത്തരം സന്ദര്ഭങ്ങളില് കോടതിയെ സമീപിക്കാം. മാധ്യമ പ്രവര്ത്തനത്തിന് മാര്ഗനിര്ദ്ദേശങ്ങള് വേണമെന്ന ആവശ്യം അംഗീകരിക്കാതെയാണ് കോടതി ഹര്ജി തീര്പ്പാക്കിയത്.
