ഡെറാഡൂൺ : ഉത്തരാഖണ്ഡിലെ അൽമോറയിൽ നിയന്ത്രണം വിട്ട ബസ് കൊക്കയിലേക്ക് മറിഞ്ഞ് 28 പേർ മരിച്ചു. തിങ്കളാഴ്ച രാവിലെ അല്‍മോറ ജില്ലയിലെ രാംനഗറിലാണ് അപകടം നടന്നത്.
മരിച്ചവരില്‍ നിരവധി കുട്ടികളും ഉള്‍പ്പെടുന്നുണ്ട്. ഗര്‍വാളില്‍ നിന്ന് കുമയൂണിലേക്ക് പോകുകയായിരുന്ന ബസ് അല്‍മോറയിലെ മാര്‍ച്ചുലയില്‍ എത്തിയപ്പോൾ നിയന്ത്രണം തെറ്റി 200 മീറ്റര്‍ താഴ്ചയിലേക്ക് മറിയുകയായിരുന്നുവെന്ന് ജില്ലാ കളക്ടര്‍ അലോക് കുമാര്‍ പാണ്ഡെ പറഞ്ഞു.
ബസില്‍ 40 ഓളം യാത്രക്കാരുണ്ടായിരുന്നു. അപകടമുണ്ടായ ഉടൻ തന്നെ നാട്ടുകാരും പോലീസും ഫയർഫോഴ്സും രക്ഷാപ്രവർത്തനത്തിന് നേതൃത്വം നൽകി. അപകടത്തിൽ പരിക്കേറ്റവരെ അൽമോറയിലെ വിവിധ ആശുപത്രികളിൽ പ്രവേശിപ്പിച്ചു.
അതേ സമയം അപകടത്തിൽ അഗാധ ദുഃഖം രേഖപ്പെടുത്തിയ മുഖ്യമന്ത്രി പുഷ്കർ സിംഗ് ധാമി മരിച്ചവരുടെ കുടുംബങ്ങൾക്ക് നാല് ലക്ഷം രൂപ വീതവും പരിക്കേറ്റവർക്ക് ഒരു ലക്ഷം രൂപ വീതവും ധനസഹായം പ്രഖ്യാപിച്ചു. കൂടാതെ സംഭവത്തെ കുറിച്ച് വിശദമായ അന്വേഷണം നടത്തുമെന്നും മുഖ്യമന്ത്രി അറിയിച്ചു.
