തിരുവനന്തപുരം: മമ്മൂട്ടിയും മോഹന്ലാലും ഒന്നിക്കുന്ന പുതിയ സിനിമ വരുന്നു . 16 വര്ഷത്തിന് ശേഷമാണ് മമ്മൂട്ടി-മോഹന്ലാല് കോമ്പോ വീണ്ടും സ്ക്രീനില് എത്താന് പോകുന്നത്. മഹേഷ് നാരായണന് സംവിധാനം ചെയ്യുന്ന സിനിമയുടെ ചിത്രീകരണം നവംബറില് ആരംഭിക്കും.
. സിനിമയുടെ ബജറ്റ് ഏകദേശം 80 കോടി. ലണ്ടന്, ശ്രീലങ്ക, ഹൈദരാബാദ്, ഡല്ഹി, കൊച്ചി എന്നിവിടങ്ങളിലായിരിക്കും ചിത്രീകരണം നടക്കുക. മമ്മൂട്ടി കമ്പനിയും ആശിര്വാദ് സിനിമാസും ചേര്ന്നാണ് നിര്മ്മിക്കുക.
ഇരുവരും തുല്യപ്രധാന്യമുള്ള നായകരായി അവസാനമായി ഒന്നിച്ചത് 2008-ല് ‘ട്വന്റി-20’ യിലാണ്. ജോഷി സംവിധാനം ചെയ്ത ‘ട്വന്റി-20’ ബോക്സോഫീസില് റെക്കോഡ് വിജയമാണ് നേടിയത്.പതിനൊന്നുവര്ഷംമുന്പ് മമ്മൂട്ടി നായകനായ ‘കടല് കടന്നൊരു മാത്തുക്കുട്ടി’യില് മോഹന്ലാല് അതിഥിവേഷത്തില് എത്തിയിരുന്നു.
നിര്മ്മാതാവ് ആന്റണി പെരുമ്പാവൂരാണ് സിനിമയെ കുറിച്ചുള്ള സൂചനകള് സോഷ്യല് മീഡിയയിലൂടെ പങ്കുവച്ചത്. ‘മമ്മൂട്ടി കമ്പനിയ്ക്ക് കൈ കൊടുത്ത് ആശിര്വാദ് സിനിമാസ്’ എന്ന ക്യാപ്ഷനോടെ ആയിരുന്നുസിനിമയുടെ വിശേഷം പങ്കുവെച്ചത്. ഇത് നിമിഷങ്ങള്ക്കകം വൈറലായ്.
ചിത്രീകരണവുമായി ബന്ധപ്പെട്ട് ചിത്രത്തിന്റെ അണിയറ പ്രവര്ത്തകര് ശ്രീലങ്കന് പ്രധാനമന്ത്രി ദിനേശ് ഗുണവര്ധനയെ കണ്ടിരുന്നു. മലയാളം സിനിമ പ്രൊഡ്യൂസേഴ്സ് അസോസിയേഷന് പ്രസിഡന്റ് ആന്റോ ജോസഫും സംവിധായകന് മഹേഷ് നാരായണനും നിര്മ്മാതാവ് സിവി സാരഥിയുമാണ്കൂടിക്കാഴ്ച നടത്തിയത്. എംപി യാദമിനി ഗുണവര്ധന, അഡൈ്വസര് സുഗീശ്വര സേനാധിര എന്നിവരും ചര്ച്ചയില് പങ്കെടുത്തു. 30 ദിവസം ശ്രീലങ്കയിലായിരിക്കും സിനിമ ചിത്രീകരിക്കുക.
1982-ല് നവോദയായുടെ പടയോട്ടം എന്ന ചിത്രത്തിലാണ് മമ്മൂട്ടിയും മോഹന്ലാലും പ്രധാനവേഷങ്ങളില് ആദ്യമായി ഒരുമിച്ചത്. പിന്നീട് അഹിംസ, വാര്ത്ത, എന്തിനോ പൂക്കുന്ന പൂക്കള്, അവിടത്തെപ്പോലെ ഇവിടെയും, അടിയൊഴുക്കള്, കരിമ്പിന്പൂവിനക്കരെ, നമ്പര് 20 മദ്രാസ് മെയില്, അതിരാത്രം, കരിയിലക്കാറ്റുപോലെ, തുടങ്ങി 51 സിനിമകളില് ഇരുവരും ഒരുമിച്ചു.
1998-ല് ഫാസില് സംവിധാനംചെയ്ത ഹരികൃഷ്ണന്സില് ഇരുതാരങ്ങളുടെ ആരാധകര്ക്കുവേണ്ടി രണ്ടുരീതിയില് സിനിമയുടെ ക്ലൈമാക്സ് ഷൂട്ട് ചെയ്തത് ചര്ച്ചയായിരുന്നു.
